錢嘉樂爆傷換面重生

錢嘉樂爆傷換面重生

今次Selina意外燒傷,身為前輩的錢嘉樂最是切膚之痛。早於八十年代,他已曾飽受燒傷折磨差點毀容,最終要一年始完全康復,難怪他刻下拍戲,將演員的安全放在第一位!

電影的爆破場面為求逼真,不少演員都愛搵命博,意外屢屢發生,例如多年前錢嘉樂拍《東方禿鷹》擔任替身,因汽油彈誤爆,導致皮膚近80%燒傷,即晚送院已變成「冇眉包公面」,醫生隨即要求他接受除去整塊面皮的手術!嘉樂說:「做完手術要等啲皮慢慢生番出嚟,成塊面冇血色,好恐怖,差唔多一年之後先好番。(唔擔心毀容?)嗰時後生唔識死。其實依家啲科技咁發達,可以先拍爆破場面,再叫演員做反應,用電腦合成效果唔差,既可避過意外,亦可帶畀觀眾十足嘅官能刺激。」對於今次Selina燒傷,他希望她可平安無事。

梁琤前臂植皮

不少女演員亦「巾幗不讓鬚眉」,拍戲大膽程度不下於一般男演員,如當年梁琤拍《影子敵人》,疑因炸藥火力太猛,不幸燒傷手前臂、嘴角及髮尾,最終要接受植皮手術,從右盆骨位取出少許皮移植到右手,此後不能穿泳衣展現人前。

而胡慧中當年亦因拍戲受到嚴重燒傷,她接受訪問時坦言沒有看過有關報道,還主動問記者事發經過與詳情,她說:「我當年都醫咗好耐,身體同面部總共30%被燒傷。(有冇植皮?)冇!因為好麻煩,等自然好番,依家留有疤痕。燒傷真係好慘,好痛,身心都受創,你哋要多啲關心同支持佢。(你當時有冇接受心理輔導?)冇,不過我好辛苦先大步檻過。自己嘅傷係冇人幫,痛楚唔會有人感受得到,尤其係佢咁後生,總之嗰種痛楚好難形容。」

吳辰君感心痛

至於吳辰君昨日得悉Selina的意外,即在微博留言:「燙傷的痛我有過,被炸點誤爆也傷過,還好都已康復,想到此我更加心痛。」她呼籲所有同業盡可能再多重視安全,將自身傷害減到零。而陳百祥多年前參與無綫台慶演出,亦不幸燒傷雙手,住院超過四十天才康復。而王喜亦因拍《烈火雄心II》時曾燒傷面部,幸而不太嚴重沒有留疤痕。

至於擅長拍攝動作片爆破場面的導演林超賢說:「誤點爆破一啲都唔出奇,以前用遙控器引爆炸藥,失靈發生意外可以理解,所以我依家寧願用電線接駁炸藥,睇準時間先按掣,咁樣相對比較安全囉!」

影視組

錢嘉樂拍戲時曾因汽油彈誤爆,導致皮膚燒傷。