王菲下周開騷全城撲Faye

神級天后王菲強勢復出，下周五於北京開騷，掀起兩岸三地藝人撲「菲」潮！阿菲密友趙薇踢爆哥哥火速掃「菲」，而泳兒亦「餓菲」多時，有意請假睇騷！

自從下嫁李亞鵬後，阿菲一直專心相夫湊女，深居簡出。隨着兩名寶貝女逐漸成長，她近年也慢慢「復出」幕前，既唱電影主題曲，又在春節晚會及慈善活動開金口，外界反應熱烈！本月29日更於老家北京開騷，旋即掀起外界的撲「菲」潮，而貴價飛亦已搶購一空！

除了北京站之外，阿菲稍後會在上海及台灣開騷，同樣群情洶湧！台灣不少紅星包括徐熙媛（大S）及林心如等，原來是阿菲歌迷，已揚言買飛捧場！至於阿菲的密友趙薇、劉嘉玲及那英等，相信亦會欣賞好友演出，而趙薇更在微博踢爆哥哥已私下掃「菲」！

泳兒請假捧場

本港不少新一輩歌手如泳兒及鄧麗欣等，亦是阿菲的粉絲！泳兒揚言希望明年初能赴台灣捧場：「我要向公司申請攞假，同埋叫台灣朋友幫我買飛！」她表示95年阿菲在新加坡出席慈善騷，當時被對方的《我願意》打動：「我成日匿喺洗手間練佢啲歌，讀書時用《我願意》參加比賽！」雖未能與偶像合照，但她珍藏不少阿菲的專輯。

鎮宇激扮「王妃超人」

王菲造型前衞多變，吸引不少人模仿！影帝吳鎮宇曾於電視節目《真過癮時代》中，反串扮演「王妃超人」，與阿菲的「菠蘿頭」及「透明膠裙」Look激似，令人爆笑！另有不少藝員憑扮菲出位，康華及楊明於劇集《娛樂反斗星》中，重演阿菲與謝霆鋒十指緊扣的經典場面，至於劉曉彤及黃泆潼亦曾扮阿菲，令人難忘！

孖李蕙敏講Fashion

與阿菲同期出道的李蕙敏，憶述阿菲的二三事：「當年我仲係Echo年代，同阿菲都幾Friend，佢嗰時叫『王靖雯』，個人好好！我哋鍾意Fashion嘢，大家性格有啲似，唔係好主動，反而玩得埋，仲試過翹手出席活動！佢生完女之後，試過喺中環撞過佢，都有打招呼傾兩句！（睇佢個騷？）當然好想睇啦！」