JC 千嬅讀心戀人

常言道「戲假情真」，不少圈中情侶都因合作而傳出緋聞，當中是真是假就留待讀者分辨，至於早已公開戀情的混血名模Jessica C.及楊千嬅，則公開與另一半煙韌，認真恨死隔籬！

冧爆JAM歌

陳綺貞、小虎

台灣歌手陳綺貞呢排又嚟香港開個唱，仲帶埋佢個結他手男友小虎，演唱期間佢不避嫌同男友Jam歌，唱到《結他手》其中一句歌詞「我最愛的結他手」時，仲刻意擰轉頭望住男友，溫馨甜蜜！

甜蜜指數：★★★★

Jessica C.（JC）、Sergio

混血名模JC同男友Sergio一向愛得癡纏，近日仲會齊齊飛去美國勇闖荷里活！早排佢哋約咗班朋友喺中環搞Farewell Party，佢哋當眾又攬又錫，JC仲多次胸壓男友，上演火辣辣嘅攬啜真人騷！

甜蜜指數：★★★★★

林峯、吳卓羲、鍾嘉欣

林峯、鍾嘉欣同吳卓羲早前出席台慶亮燈儀式，對於有報道指佢哋陷入三角戀而兄弟反目，林峯聽完得啖笑，不過三人合照時出現「嬲」字嘅場面，嘉欣仲尷尬到用手遮住塊面，好難令人信佢哋冇嘢喎！

甜蜜指數：★

傅穎、羅仲謙

傅穎同羅仲謙自從開始傳緋聞後，就吸引到好多活動搵佢哋兩個行騷，不過原來要佢哋有親熱動作，價錢就要再傾，佢哋仲話如果酬勞滿意，就算又攬又錫都得，果然好識靠緋聞搵真銀！

甜蜜指數：★★

楊千嬅、丁子高

楊千嬅五場紅館演唱會終於圓滿結束，最後一場請咗老公丁子高上台情深對唱，成為全晚高潮！佢哋喺台上又攬又錫，更手拖手唱情歌，令全場歌迷嗌到拆天。

甜蜜指數：★★★★

鄭元暢、林依晨

近排中日關係緊張，但係台星鄭元暢（小綜）同林依晨依然冇有怕，赴日本出席《亞洲音樂高峰會》，佢哋喺台上合唱時，拖手、擁抱、親嘴交足戲，絕不欺場！

甜蜜指數：★★★

周柏豪、官恩娜

周柏豪最近可謂艷福無邊，除咗同楊愛瑾拍劇奉旨談情外，又同賭王千金何超雲傳緋聞，近排佢同官恩娜拍港台劇《有房出租》亦大搞曖昧，繼上集大演床戲後，今次都有攬到實一實，差啲就錫埋嘴添！

甜蜜指數：★★★

蔡卓妍、陳偉霆

蔡卓妍同陳偉霆自從公開咗「陳蔡戀」後，就唔怕畀人影到佢哋一齊，唔使偷偷摸摸真係唔同啲，好似早排佢哋仲以情侶姿態出席友人飯局，攞正牌喺人前甜蜜，仲同朋友玩祝酒，十足十新人咁！