林嘉欣驚險誕6磅8女嬰

林嘉欣與丈夫袁劍偉婚後在加拿大定居，上周五嘉欣誕下重六磅八安士的愛女Kayla，她透露在分娩過程中，BB頸部曾被臍帶纏着，幸好有驚無險。

林嘉欣於香港時間上周五（十五日）於加拿大誕下愛女榮升母親，女兒重六磅八安士，取名Kayla，意指純潔和多人愛錫，中文名則留待外公決定。

餵人奶好辛苦

Kayla的眼睛和長長手腳與父親袁劍偉（Steve）十分相似，而面形、鼻和口則與嘉欣一個餅印。嘉欣接受本報記者電話訪問時透露，原本自然分娩，但臨盆時發現女兒頭部掉轉，醫生嘗試調校BB頭部方向時，BB心跳不停下降，原來頸項被臍帶纏着，故即時決定剖腹，令半身麻醉的她十分擔心，幸好最後有驚無險，嘉欣說：「當時好凍，Steve全程雙手握住我對手，最後由佢親手剪臍帶。」

留院三日便回家休息的嘉欣，難掩喜悅之情，她透露已請了陪月，每兩小時親自餵人奶：「餵奶好辛苦，體力上都有困難，不過一見個女就乜都軟化晒，依家傷口都痛，唔敢彎腰。好在之前都有上堂學湊BB，所以唔係太緊張。妹妹每日過嚟抱BB，因為女兒係林家第一個孫，而媽咪三十多年未抱過BB，所以抱時好緊張。」

呼籲勿送BB衫

嘉欣透露BB英文名是由她改：「因為我叫Karena，想個女一樣係K字開頭，我成日都話：『OK啦！』咁諗諗吓Kayla都幾好聽，就用咗！」她又呼籲各方好友不用再送BB衫，因為現已足夠BB着到兩歲。她又表示這一星期以來，很多朋友恭喜，令她感動和窩心。她又指不欲契媽潘迪華長途跋涉赴加國，故已第一時間告知喜訊。

問到會否復出，她說：「從來都冇話唔做，演藝事業係我一生嘅工作。相信呢幾年對我嚟講係一個經驗，話唔定對日後表演各方面有幫助。（再追？）未知，但都唔想全家人集中晒喺個女度，都想平均吓！」不想讓女兒被過分寵愛的她，有意再追多個來取得平衡。