動漫Maggie離奇捱刀

兩位o靚模「動漫Maggie」李曼筠及「中巴」鄺敏慧雙雙落難！自捲入崔建邦傷人案後，中巴曾一度風光瘋狂接Job，如今卻降呢變舉牌女郎；Maggie更慘，被發現遍體鱗傷後卻不願報警，只恨自己冇帶眼識人！

動漫Maggie李曼筠入行4年，憑乳牛級身材紅遍龍友界，惜近年o靚模多如雨後春筍，Maggie的勢頭也不如以往。工作減少已夠苦，昨日出席活動時，更被發現身體出現多處明顯傷痕，問到是否因感情瓜葛所致？Maggie支吾以對，卻愈描愈黑！

Maggie出席網上電台節目時一直遮遮掩掩，記者隨後發現她左邊下巴有圓形瘀傷，黑色一撻，左邊鎖骨則有抓傷後結焦的傷痕，雖然穿上黑色絲襪，但仍遮蓋不住右大腿兩條殷紅的刀傷。

被發現周身傷後，Maggie大感錯愕，立即用手掩着下巴，見記者相機對準大腿刀傷，她又即拉低裙，欲蓋彌彰。問到因何受傷，Maggie扮失憶：「唔記得！」但問她何時發現傷勢？她又離奇記得為何受傷：「今日先發現，或者我畀貓抓傷，又可能係發夢打功夫打親自己。」自言曾習武的她慨嘆：「學功夫係想保護自己，可惜最後都保護唔到！」當解釋大腿刀傷時，Maggie更聲稱是在廚房玩刀時弄傷！

拍拖受苦寧願唔要

記者直接問到是否被男友打，自稱冇拍拖的Maggie卻似有暗示：「總之我接受唔到痛苦，如果拍拖要受痛苦，呢啲痛苦我唔要！」其後她否認被虐待，強調事情不是今天發生。

本報記者事後致電Maggie，再問到是否被打時，她愈講愈激動，全程嗚咽地說：「唔想搞大件事，唔想直接講，總之唔係家庭同感情問題！」說罷又鄭重表示女士一定要帶眼識人及自我保護，但她強調不會報警，只怪自己沒有帶眼識人。然而，Maggie於Facebook留言，寫出四個日期並表示感到「好痛」：「想不到現在更傷，外傷加內傷……點解咁苦？」但該留言於昨晚較後時間已被刪除。她同時在微博表示希望息事寧人，令事件更耐人尋味！