關楚耀雞手鴨腳變人鬼整蛋糕

關楚耀日前變身「整餅茂」與歌迷炮製蛋糕，首次整餅的他論論盡盡不知所措，還要整餅師傅捉實他的手授課，場面搞笑！

早前關楚耀（Kelvin）推出全新專輯《HERE I AM》反應不俗，為答謝歌迷支持，日前他親自「下廚」整餅送給歌迷。他甫抵現場即興奮地介紹材料，十足十烹飪節目主持！自知新手的他雖已特別邀來專業整餅導師從旁幫忙，但仍然戰戰兢兢。Kelvin為蛋糕塗忌廉時雞手鴨腳，令師傅忍不住要捉着他的手「零距離」授課，他卻搞Gag指這個畫面甚有電影《人鬼情未了》的感覺，氹得現場的粉絲笑爆嘴！

唔介意女友冇「煮」見

充當小助手的歌迷同樣搞鬼，見偶像手忙腳亂竟狂笑他！不過，當他們裝飾蛋糕時冧番Kelvin，在蛋糕上寫上巨型「K」字，還鋪上大大粒士多啤梨，最後由Kelvin灑上朱古力碎作點綴。他即時要求歌迷試食，還親自餵食士多啤梨，認真Sweet到爆！他透露平日喜歡入廚，但整蛋糕還是首次：「整蛋糕甜蜜啲開心啲！（收過女友整嘅蛋糕？）冇喎！反而阿妹就有整過。」Kelvin直言即使未來女友不懂烹飪亦冇問題，因為他樂於為對方親自下廚！

另外，近期迷上微博的Kelvin直言與歌迷關係拉近，遇上有歌迷生日便想與對方慶祝：「我知道佢哋好支持我，所以一直都想同佢哋聚吓，所以提出同歌迷一齊整嘢食，希望遲啲可以同埋內地歌迷聚會，因為差唔多三年冇返過去宣傳！」