祥仔新劇跨年代騎呢吸收視

無綫帝后戰況激烈，「最佳劇集」也鬥得難分難解！前晚首播的《巾幗梟雄之義海豪情》收視比上一集大躍進，但卻出現「跨時代」道具，更有「騎呢人」等潮語，令人啼笑皆非！

無綫台慶劇《巾幗梟雄之義海豪情》主角黎耀祥與鄧萃雯，前晚夾份宴請台前幕後齊齊睇劇，見證首集收視平均32點、最高36點的佳績，與《巾幗梟雄》首集27點相比可謂大躍進，但比《公主嫁到》稍低，令「最佳劇集」之戰更為激烈！

首集最令人難忘的，莫過於飾演九妹的雯女與劉江在銀行爭拗的一場戲，兩位實力派大鬥演技，相當入戲！事後不少網民討論劇情及細節，有人在其中一場數銀紙戲中發現面額1百元一張的鈔票，但當時是30年代日治的廣州，其真偽令人質疑；而劇中麥包所戴的頭盔，亦被指不屬於該年代；至於黃浩然的對白更出現「騎呢人」這個潮語，令人啼笑皆非！

慶幸唔使執牛屎

本預期有37、38點收視的祥仔，昨日拍攝另一劇集《天天天晴》時表示未感失望：「好開心，係個好開始，好多朋友都話趕唔切返屋企睇，相信9點後收視會好啲。（上次承諾唔好睇就執牛屎，有冇更突破嘅承諾？）上次係監製李添勝一時豪語，我哋做嘅梗係要撐啦！」

至於鄧萃雯除寄望有高收視外，還希望劇集能吸引觀眾趕返家收看。對於勁敵佘詩曼因拍劇而有機會缺席頒獎禮，問到是否增加視后贏面，雯女說：「如果阿佘攞，公司都要佢返嚟啦！（你會唔會出席？）入唔入圍都未知。（唔入圍都返嚟支持？）坦白講，唔會！我要去橫店拍劇，返嚟要度期o架！」

黃浩然不滿收視

不過，黃浩然昨日為醫學美容集團拍廣告時，坦言不滿意收視：「可以再好啲囉！8點半好多人未返到屋企，我哋有信心會好，唔會畀添哥執牛屎！」另外，惠英紅的母親早前入院，前日她在微博透露母親已完成手術，情況良好，並感激《義》劇全體演員的祝福。