李嘉欣漏口風佗慈姑椗

李嘉欣以40歲高齡成功佗兔B，昨日仍穿4吋高踭鞋出席活動，一直對腹中塊肉性別守口如瓶的她，昨日自爆會用姨甥仔的二手衣物，暗露玄機！

懷有「億萬富B」的嘉欣，昨日出席中環國際金融中心舉行的《Leica LOVE Project》揭幕儀式，大會即場展出由嘉欣、Maggie Q及余文樂等拍攝的作品，稍後將拍賣作慈善用途。嘉欣昨日身穿鬆身衫，但腹部明顯脹大，而且面容飽滿，但仍貪靚腳踏4吋高踭鞋，在工作人員保護及開路下上台，訪問期間亦被安排坐在椅子上，十分大陣仗！

亨亨將陪入產房

自言肥了十多磅的嘉欣，不願透露懷胎幾多個月：「你哋覺得幾多（個月）就幾多啦！（仔定女？）知道咗，遲啲先講！（老公畀你着高踭鞋？）老公都畀，我平時着平底鞋多！」她透露亨亨已答應陪她入產房，並已買定攝錄機拍攝重要一刻：「佢有重任o架！會陪我一齊入產房同拍Video，呢排有好多朋友生咗BB，我都睇家姐同朋友嘅生B片段，覺得好Shock（震驚）同好Intense（緊張）！」

嘉欣雖未有公開腹中肉性別，但言談間已漏口風懷男胎，她更大讚姨甥仔樣貌俊俏，亦不介意執二手衫仔，她笑說：「我諗住多數用番家姐啲BB嘢，可以環保啲！家姐個B好靚，BB大得好快，大家Share用可以慳唔少！（家姐嗰個係小王子，你嗰個係咪小王子？）好多嘢都係Unisex（中性），例如粉黃同白色，唔一定係粉紅色嘅！」

均衡飲食冇進補

懷孕4個多月的嘉欣，身體及飲食習慣出現變化，但就百無禁忌完全冇戒口：「胃口轉變咗好多！以前好鍾意食甜嘢，連正餐都會食甜品，不過依家好抗拒，唔係完全唔食，但唔會好似以前咁食完晚餐食幾個甜品囉！我亦冇特別戒口，生冷嘢都照食！（進補？）我覺得唔使特別食參茸海味，均衡飲食已經OK！」早前她已透露會開刀生B，所以亦沒有刻意做瑜伽，只是閒時行路當做運動。

另外，對於有傳奶奶下禁令不准出騷，嘉欣表示不清楚未來工作安排：「我依家連垂頭都望唔到自己啲腳趾，預計會安排多啲時間休息！產後復出就順其自然啦，我唔介意拍纖體廣告！」問到會否母子檔上陣拍廣告？她即耍手擰頭說：「唔會，BB仲咁細，唔想咁快同個圈咁Close，等佢懂事先啦！」