孖住羅仲謙搵銀 傅穎自認專一唔同人搞
傅穎（Theresa）和羅仲謙昨日以情侶檔行時裝騷，只見Theresa比同場的鄭嘉穎緋聞女友徐靖雯矮了一大截，但阿謙竟讚Theresa長腿煞食，擺明情人眼裏夠盲目！他說：「我不嬲覺得佢身材好靚！」氹得Theresa眉開眼笑，Theresa又讚他的巨胸「超勁」，公然打情罵俏！
問到兩人同台是否有「情侶價」？Theresa說：「有呢個Term，但唔知係咪貴啲！（搞多啲緋聞再貴啲？）即係同好多人搞？我唔得o架！我不嬲都專一。」兩人在台上親熱動作欠奉，阿謙說：「大會冇要求，我已經自發扶佢腰！唔同動作要收唔同價錢o架！（又攬又錫？）如果酬勞滿意都OK！」
至於徐靖雯表示最近工作很忙，但不認同是緋聞帶旺她：「我很努力，不停做Gym及學游泳Keep Fit！」她又表示與鄭嘉穎仍有聯絡：「有通電話，大家是朋友！」但得知對方表明冇發展可能後即變臉說：「沒失望，而且他大我很多，怕溝通有問題。」
羅仲謙（左起）只讚Theresa長腿煞食，卻懶理高人一截的徐靖雯。
徐靖雯暗寸鄭嘉穎年紀大，但承認大家是朋友。
Theresa昨日行騷時，自認感情專一。