諸葛梓岐馬場獻技 自命旺夫

模特兒諸葛梓岐（Marie）昨日在沙田馬場行騷，她自認有賭運兼旺夫，但原本答應到場的男友薛嘉麟卻臨時甩底。

諸葛梓岐、姚予晴、貝安琪及台模瑞莎昨日為沙田馬場舉行的《莎莎婦女銀袋日》作時裝表演，而Ana R.則放棄行騷，升呢擔任時裝騷監製。

眾多模特兒之中，以Marie最為性感，她坦言騷前未有試衫，幸仍「撐得住」，問到其上圍尺碼，Marie堅持保持神秘：「望到就算，唔好公開。」另外，Marie的男友、Neway太子爺薛嘉麟原定擔任大會嘉賓之一，但最後未有現身，Marie即為對方解畫：「佢驚我怕醜，所以冇喺度睇我，佢亦唔想成為畀人閃（拍照）嗰個。」她指男友以往有養馬，亦計劃購買數匹名駒作投資。至於賭馬，Marie自稱與男友都不擅長，但卻自認有賭運：「我打牌多數都會贏。（旺到身邊人？）呢啲要身邊人講，至少冇剋住佢。（你好旺男友嘅事業？）你問佢啦！」

Ana R.升呢做監製

而首度擔任時裝騷監製的Ana R.，直認感覺有趣及富挑戰性，問到是否有意轉型？她否認：「只係做多樣嘢，依家嘅模特兒都唔止做一種工作，我有教新一代模特兒行騷。」她笑言直到結婚才會退休，但現時仍是單身，故距離退休的日子仍相當遙遠。

此外，李嘉欣的老爺奶奶許世勳夫婦名下愛駒「讚惑」昨日出賽奪冠，二人偕兒子許晉亨到場，但未見大肚嘉欣影蹤，問到嘉欣的近況時，許晉亨例牌笑而不答。