Kary透視性感騷靚背

紅外線透視偷拍令人人心惶惶，但時裝界捲起的「透視風」卻受追捧，男女明星都加入合法透視行列，身兼時裝節目主持及名模的陳嘉容（Eunis）化身「潮拜教師」，逐一「透視」他們的衣着品味！

萬寶寶噴血指數：★★★★★

「啱啱攞咗傑出衣着人士嘅佢着得好Classic（經典），簡單髮型同妝，配埋少少首飾已經好靚，胸口同腳位嘅See-through位置唔會太性感，令人將個重點放喺上面，對黑色高踭鞋好Match，着白色反而冇咁好。」

陳奕迅噴血指數：★★★

「呢個婚禮Look之前都見過，好得意！好Playful！真係得佢先着到呢種衫，好欣賞佢有呢個玩味形象，可以Carry到呢類型嘅衫！」

徐子珊噴血指數：★★★

「好穩陣，唔會話好突出，又唔驚畀人話唔靚，好有女黑俠Feel，不過手袋同手套轉做金、銀或紅色會突出啲，而Shoulder Pad好興，佢個膊夠細先Carry到。」

吳雨霏（Kary）噴血指數：★★★★（5★最高）

「如果條裙短到去Ruffle位就好，唔好嘥咗佢對長腿，頭髮稍為紮起，騷番膊頭同背脊嘅See-through就更靚，裙襬已經好誇張，配飾方面簡單咁加對耳環就可以。」

楊千嬅噴血指數：★★★

「舞台感好重，上身OK，不過呢種Boot好易令對腳變短，換對粉紫或深紫色高踭鞋，最好係閃石或者珠片款，咁喺舞台上就更搶眼！」

林峯噴血指數：★★★

「佢好靚仔，一向都係公子形象，好官仔骨骨，今次有啲啲唔襯佢平時嘅形象，換過對黑色Boot，好似Dr. Martens中筒款會好啲。」

楊丞琳噴血指數：★★

「都唔係好透視，唔係好特別，係時下女士嘅打扮，上身好夏天，下身就冬天，裏面件白色背心轉做黑色超迷你皮背心裙或者係皮Bra Top會Match番對Boot，如果乜都唔變，淨係換白色高踭鞋就會娘。」

林司敏噴血指數：★

「髮型同條粗Belt合格，建議佢下身換番條黑褲，一身全黑打扮咁仲型，或者將上身衫換白色，咁就更加Sweet。」

Profile

名模陳嘉容（Eunis）未有正式修讀時裝設計，但從行騷經驗中累積豐富時裝知識及Fashion Sense，追求美感的她現時主持有線娛樂新聞台《潮拜教室》，本着「不怕Hurt人，只望你靚」的宗旨，品評圈中人衣着，為主播及觀眾大翻身。