周秀娜胸壓元華撻傷頸

周秀娜在新片《殭屍新戰士》中，有多場動作戲，雖然她沒有武打底子，但依然親身上陣，拍攝大戰元華的戲份時，她手腳並用從後熊抱胸壓元華，不過最終被撻落地，搞到跌傷頸！

周秀娜（Chrissie）、錢小豪與元華在羅守耀執導新作《殭屍新戰士》中飾演殭屍，而《殭屍先生》始祖元華在戲中演殭屍反派，追殺善良殭屍Chrissie與錢小豪。Chrissie在片中有不少動作場面，大部分都親身上陣，其中有一場戲在棄置屠房取景，拍攝她與錢小豪大戰元華的場面，劇情指錢小豪不敵元華，Chrissie撲向元華身後勇救錢小豪。

上下施襲

Chrissie在該場戲中瞓身演出，手腳並用，先用雙腳箝實元華下半身，雙手則執住元華的古烈治頭，又掩住他雙眼，有如打摔角一樣。不過，沒有武功底子的Chrissie，最終被元華狠狠撻落地，傷及頸部：「導演問我使唔使替身，不過我跌落地嘅時候，個鏡頭影住我個樣，所以我話唔需要用替身，點知就跌親條頸，我成個人即刻硬晒！」

打戲狂NG

問到拍這場戲有否NG？Chrissie說：「好多次！都拍得幾辛苦，試戲嘅時候我騎住華哥（元華），佢係咁轉我，搞到佢喘晒氣又腳軟，最後佢叫我落地畀佢留吓力先，不過華哥身體好好，一啲都唔似呢個年紀。」談到胸壓元華，她即笑說：「係呀！我攬到佢實呀！」對於與前輩合作，她大讚元華好人，自己首度拍動作戲，幸得對方提點，獲益良多。