Alan力撐Sally絕不退縮

捲入桃色糾紛的樂隊Mr.主音Alan（布志綸），處處維護富家女Sally，Alan揚言作為好友，他一定幫到底，絕不會退縮，更要為年輕人做個榜樣。

樂隊Mr.主音Alan大前晚到九龍塘一間豪宅門外與富家女Sally在車廂密會，自稱Sally「男友」的吳姓男子突然怒不可遏，拉Sally落車，聲稱有人搶走其未婚妻，現場有人爆樽，事後Alan被警拘捕保釋候查

事發後Mr.與譚詠麟到杭州宣傳新碟，今晨會返港出席一個汽車活動，Alan昨晚做騷前接受記者長途電話訪問，他坦言曾跟Sally聯絡，更維護對方說：「唔好搞佢，佢唔係圈中人，我唔想講咁多，唔答啦！」雖然Sally表示吳姓男子乃其前度男友，但當晚爆樽的紅酒樽上招紙上卻寫「to老公」，「Love Sally」字句，Alan承認有問過Sally：「佢話所有呢啲嘢係嗰個男仔安排，錄口供時講過，有人情緒失控。」

陳奕迅曾致電慰問

Alan表示作為朋友，大家互相關心，被問到知否吳生可有聯絡Sally？他說：「有冇我唔知，但有叫佢小心，我實在唔想同嗰個男仔有任何牽涉，因為我根本唔識佢。」被問到與Sally關係，他說：「朋友。（有冇感情瓜葛？）冇，朋友要幫就幫，發生咗事，唔可以有事就縮，我係Artist要話畀年輕人知，做番啱嘅事。（你同Sally有冇發展？）我唔知，總之做番好朋友做嘅嘢。」獲唱片公司支持的Alan說：「公司了解晒支持我，陳奕迅都有打畀我。」他表示不認識Sally父母：「唔好再講，唔好寫人哋私人事，從我立場出發，我會做朋友應該做嘅嘢！」

不干預歌手私生活

環球唱片高級副總裁黃劍濤亦撐Alan說：「唔係爭風呷醋，Alan係護花驚女仔被傷害。（佢哋拍拖？）係朋友，當然日後冇人知。」黃劍濤表示向來不干預歌手私生活！至於Sally父親陳明耀則不欲多談，他在電話中說：「好多同事等我開會。（Sally心情點？）冇乜好講，（佢稱吳生做老公？）唔知啲細路仔嘢，我唔理。」而阿倫昨午則在微博上載兩張照片，表示帶Mr.去吃飯，飯後出發工作，並影張一帆風順照片，又在佛像前合照。