阿Sa懶理Baby睇法 奮力護愛苗

蔡卓妍（阿Sa）與陳偉霆（William）公開已熱戀三個月後，不足一星期，負面報道未停過，身經百戰的阿Sa昨日現身公開活動，回應流言時處之泰然。

阿Sa昨日現身活動宣傳新碟，對於「陳蔡戀」揀正10年10月10日公開戀情後，成為一時佳話，引發多角戀情，先指她介入William與前女友Angelababy的戀情，刻意爭取兩人工作機會方便見面，又傳陳蔡「蜜」租愛巢，對此阿Sa拒絕評論：「要講都講晒，同William公開有心理準備面對流言，自己唔會理，講幾多都冇用。」

對於Baby在微博質疑「陳蔡戀」不只3個月？阿Sa說：「我有睇吓，但睇唔到。（佢火速刪咗？）我有問William，佢話唔相信Baby咁做。（身邊人做？）呢個唔回應。（Sa爸都唔知你哋拍拖？）老竇好幫我哋，唔會同其他記者講呢啲。（佢話係咪宣傳喎？）老竇係咁，好搞笑！（見家長？）畀空間我哋，我哋係一棵小幼苗，唔多時間見，畀時間、空間我哋培養。」阿Sa坦言選擇公開只希望能與平常人一樣拍拖，但談到拖手逛街，她透露要留待沒有傳媒跟蹤才可以，問到有否後悔公開？阿Sa說：「一定有壓力，唔想……吸收對上一次經驗，唔講又唔係咁好，今次試吓講啦！」

阿嬌為感情事煩惱

提到自己的Fans與Baby粉絲掀罵戰，阿Sa說：「希望Fans唔好激動，平和啲。（見到Baby會唔會尷尬？）唔知，唔會啩！（關係亂？）今日係新碟發布會，同主打歌一樣，我都係希望《簡簡單單》，外人點睇唔理，總之開心同幸福係自己嘅。」

此外，阿Sa好姊妹鍾欣桐（阿嬌）日前在微博上發表感性留言，似有意效法阿Sa公開戀事，令人不禁聯想最近有指她撬鄭融牆腳、暗撻音樂人莊冬昕。阿Sa坦言阿嬌近日受私事困擾：「呢兩日有不停傾同開解佢。（鼓勵佢公開？）如果係，唓！有乜啫！我都仲喺度。（為感情事唔開心？）係私人事，每個人都有私隱。」

莊思敏：開心咪得

另一邊廂，莊思敏前晚出席首映時表示，男友吳浩康事前都不知William及阿Sa拍拖，知道後感到驚訝：「知佢哋熟，但唔知係情侶關係，幾好呀！開心咪得囉！」

而莊思敏昨日擔任絲襪模特兒時坦言，擔心被紅外線透視偷拍：「頭先我着住短裙，有龍友低炒影我令我有啲驚。政府應立法制裁紅外線偷拍，咁做等同性騷擾同非禮。」她表示男性亦可能成為受害人：「如果個男仔嘅Size好細咪會介意，對自己Size好自豪嘅就唔介意囉！（點防範？）淺色衫透視效果明顯，咁咪着深色衫，最好有黑色乳貼賣。」