陳父：等佢哋慢慢發展

昨日大批記者在事件女主角Sally Chan與父母同住的九龍塘渭州道逾億獨立屋外守候，繼前晚乘座勞斯來斯座駕返寓所後，昨午3時許，陳母轉乘坐賓利豪華房車返家，問到女兒是否在家，她忟憎地說：「冇人！唔喺度！」說罷更以手袋揮向記者方向。

下午4時許，陳父駕駛紅色保時捷返家，看見記者即以手掩面，並兜多兩圈才入屋，其後有工人出入大宅買餸，更有餅店送來4個約5磅重的蛋糕。及至傍晚6時半，有警員接報到場，換過衫的陳父步出大宅任影，並說：「有咩幫到你哋？」問到事件中的吳姓男子是否女兒的未婚夫，他幽默地說：「呢啲係細路仔嘅嘢，大家點會知？你老婆聽日係咪你老婆，你都唔知啦！（女兒同Alan係咩關係？）朋友啫！細路仔嘢唔清楚，你老竇都唔知你出面發生咩事啦！」記者要求他與女兒一同受訪，他返入大宅後不久再獨自步出，並說：「阿女唔出嚟啦！現實啲啦！（佢喺屋企？）係。（介意個女同明星拍拖？）細路仔嘢唔理啦！等佢哋慢慢發展！（佢哋係好朋友？）係，我同你都係好朋友啦！」晚上，陳父在家開派對招呼賓客。陳父全名是陳明耀，除了是萬利玩具主席兼行政總裁外，還是博愛醫院總理，身兼多職，保守估計陳父身家已達數億元，相比家住薄扶林置富花園的Alan實在有天壤之別。