Alan捲爆樽案被捕揭迷離三角
樂隊Mr.主音布志綸（Alan）前晚捲入桃色糾紛，被一名吳姓男子指斥「你搶我未婚妻」，期間有人爆樽，最後Alan被捕。事件女主角Sally雖聲稱吳姓男子並非其未婚夫，已分手幾個月，但涉案紅酒樽上的招紙，卻踢爆她當晚仍與吳姓男子以「夫妻」相稱，懷疑有人一腳踏兩船！
警方發言人昨日證實Alan被捕，暫准以500元保釋候查，今年11月再向警方報到，案件列作「普通襲擊」，並交由九龍城警區接手調查。Alan前晚由樂隊成員Dash、Tom及唱片公司高層陪同下，於清晨5時半離開警署，再於昨晨與Sally接受查小欣《巴巴閉邊個夠我查篤撐》訪問。期間，Sally聲稱已跟「未婚夫」分手，但本報卻發現現場遺下的「La fleur de Bouard」法國紅酒樽招紙，上款寫着「Happy Birthday老公」，下款則是「Love Sally 12-10-2010」，顯示她當晚仍以「老公」稱呼對方，令人懷疑有人劈腿，導致事件鬧大！
A ：Alan S：Sally 查：查小欣
查：Sally，究竟你同Alan係咩關係？
S ：我同佢係好朋友、好朋友、好朋友。
查：尋晚喺你屋企門口個男士，同你又係咩關係？
S ：佢係我前度男朋友！
查：佢聲稱係你未婚夫？
S ：絕對唔係我未婚夫，我亦唔知點解佢咁講。
查：究竟Alan同你及嗰位先生發生咩事？
S ：我約咗Alan喺我屋企出面門口。
A ：（插嘴）諗住借你個叉電器。
S ：係呀！咁就上咗佢架車，點知我前度男友見到我上佢架車就衝上嚟，即刻拉我落車，Alan見到之後落車分開我兩個，問究竟發生咩事，之後佢（吳先生）好似好激動，我哋唔知點解無啦啦情緒有少少失控。
被玻璃指嚇
查：你嘅前度男友吳先生？
S ：係，佢情緒好似失控咁，當時我好驚，行埋Alan身邊，之後佢（Alan）完全出於一個保護我嘅態度。
查：Sally同前度男友吳先生分咗手幾耐？
S ：分咗手好幾個月，Keep住冇乜聯絡。
查：Alan送你返屋企定純粹攞個叉電器？
S ：我一早約咗佢，叫佢喺屋企等我，因為我要畀個叉電器佢。
查：吳先生一直喺你屋企門口？你知唔知佢喺度？
S ：我哋之前出咗去食飯，係朋友式嘅食飯。（前男友食完飯送你返屋企？）係呀！（跟住Alan揸車攞嘢？）係呀！
查：你前男友跟住激動？
S ：係呀！但已經分手幾個月，大家係朋友關係。
查：你知唔知佢有前男友？
A ：完全唔知。（你同Sally係好耐朋友？）唔係，識咗兩、三個月。
查：吳先生打爛玻璃樽？（係！）（咁你驚唔驚？）佢曾經攞住玻璃樽碎片指住我，而Sally當時好激動、好驚，咁我就撞開佢哋，因為要同佢保持距離，唔知嗰位男士會唔會做一啲攻擊行為。大家都好理性去談判，點知佢報警，話我傷佢，即係話我郁手，呢一刻要Sally去澄清。
S ：Alan係出於保護我嘅心態，好慶幸佢喺度保護我。
查：任何男士都有呢個反應？
A ：係呀！好正常，我做番朋友同正常人應有嘅反應。去到警署，我見唔到姓吳嘅男士，我解釋事件經過，佢哋要搜集我嘅證供、吳先生證供同Sally證供，由於個男人話我襲擊佢，或者我郁手先，程序上要問我先。
查：Sally遲啲會唔會去警署助查？
S ：一定會，講出發生咩事。（警方聯絡你未？）聯絡咗，約咗個時間。（為Alan討公道？）係呀！
五百元保釋
查：Sally係咪同吳先生和平分手？
S ：都係o架！（估唔到佢有激烈行為？）完全估唔到。
查：你有冇受傷？
A ：冇，大家基本上冇打過交，只不過我推開咗佢，第一時間最基本反應。（500元保釋？）係呀！警方話對方報警，稱我打佢，我同警方講件事會唔會係誤會呢？我唔牽涉佢兩個之間嘅嘢，只係話佢有可能威脅到個女仔，所以撞開佢。
查：今次係無妄之災？
A ：絕對係啦！好無奈！（見義勇為惹禍上身？）係呀！
S ：我都唔好意思，麻煩到佢。（同吳生聯絡？）佢有打畀我，但我冇同佢講嘢。（係咪證人？）係。
如期赴杭州
Alan接受查小欣訪問後，即會合Mr.其餘四子到機場出發往杭州，昨晨10時45分，本報獨家拍得他們現身機場，戴帽及黑框眼鏡的Alan，與送機的歌迷有說有笑，心情似乎未受影響，拍撐Dash亦力撐他冇錯。雖然Alan一臉倦容，但仍非常合作地接受本報訪問。
記：記者 A ：Alan
記：報道話你爭女？
A ：同報章上講嘅嘢好唔同，當時女事主受到少少威脅，作為朋友甚至人，都應該保護個女仔。佢（吳先生）開我車門拖個女仔出嚟，我都好愕然，諗唔到可以做咩，覺得一定要落車推開佢。（知唔知女仔同個男人嘅關係？）我唔理佢哋感情上有乜瓜葛，無論點都要以個女仔嘅安全為先！
記：幫朋友惹禍？
A ：清者自清，大家都知我係乜嘢人，了解Mr.唔係鍾意生事嘅人，我唔覺得需要同對方（吳先生）和解，我冇做錯，又唔識佢。我當時見佢情緒咁激動都想報警，但原來佢已經報咗警，仲告番我傷人。
記：Sally有冇同你道歉？
A ：有，佢唔好意思，好唔開心。
捲入桃色糾紛的Alan，獲准以五百元保釋，下月再向警方報到。
Alan清晨離開警署後，在微博向歌迷報平安。
警員接報到場後，向Alan了解事發經過。
現場遺下的酒樽上，顯示Sally於事發當晚仍以「老公」稱呼吳姓男子。
身穿西裝的男事主，着記者不要拍攝。
事發經過
Sally登上Alan座駕，將叉電器交給他。
吳姓男子突然出現，將Sally拉落車。
Alan擔心Sally受傷，將她與吳姓男子分開。
休息一晚後，Alan昨日如期偕Mr.拍檔出埠。
得悉有Fans擔心到喊，Alan即透過電話安慰。