何潤東Ready揼甄子丹
內地年度影壇盛事《第19屆中國金雞百花電影節》開幕式暨文藝晚會，昨晚假江陰舉行，除了擔任大使的任達華及袁詠儀（靚靚）外，台灣男星何潤東亦現身表演，眾人不約而同表示乃首次到訪。
即將參與電影《大鬧天宮》的何潤東透露，已做足心理及生理準備在戲中與「宇宙最強」甄子丹對打：「有機會同發哥及甄子丹合作好開心，我唔使再喺街市等發哥喇！」
至於將於當地逗留5天的靚靚透露，適逢丈夫張智霖正在內地開工，令兒子魔童大感不快，並經常致電詢問他們何時回家，令她相當心噏！不過，熱愛電影的她笑言有感兒子年紀漸長，故有意接拍一些大製作滿足自己的戲癮。而來去匆匆的華哥表示，活動翌日隨即返回澳門繼續拍攝新片《熱愛島》，及至頒獎禮當晚（16/10）才折返當地。雖然忙碌非常，但他仍樂在其中：「因為我同拍檔陳冲好有火花，之前拍咗場喺雨中談情兼鬧交戲份，當時個心真係想帶老婆琦琦嚟！」
何潤東在舞台上「畀女圍」，未知現實生活是否如此？
靚靚及任達華齊齊撇下另一半赴內地撐場，認真有心！