衞蘭姊妹情深：無論點都支持

自衞詩（Jill）因藏毒被捕後，身為家姐的衞蘭（Janice）一直於Jill身邊加以鼓勵及照顧，上至起居飲食，下至經濟上支出，Janice亦一手一腳為妹妹打點，雖然娛圈工作受阻，但Jill未有放棄，亦不叫Janice失望，開拓另一方面的才能，創作DIY手工藝飾物，Janice更曾透露希望賺錢給Jill開舖做老闆。

對於Jill再踏娛圈，闖入影壇展開新一頁，Janice透過公司表示高興：「當然戥佢開心啦！無論點我都支持佢，難得有機會喺人生中搵到新工作，希望佢做得好。」剛巧Janice個唱將於本周六舉行，不禁令人期待Jill會現身台上與Janice同台演出，不過Amusic高層王凱文就以「不太適當」為理由，表示屆時Jill將不會演出。

另外，跟衞詩一齊演出福音電影的陳敏之，大讚Jill狀態好，她說：「佢好有禮貌打招呼，見佢化妝整頭時，會一路化妝一路唱歌。」同是教徒的關心妍說：「希望信仰繼續畀信心佢去面對唔同挑戰，帶領佢好好用音樂或演出祝福更多人，我會為她復出禱告。」而跟衞詩同期出道的泳兒亦表示，一定支持她復出。