恨嫁Toby大騎樓搶花球

梁靖琪（Toby）穿低胸裝出席結婚Party，大晒事業線。她希望3年內出嫁，更爭位搶花球，又暗寸羅仲謙與「傅小姐」的緋聞，令對方口啞啞！

昨日Toby與羅仲謙到昂坪360出席《360idream十全十美結婚派對》，身穿低胸裝的她露出「偉大」上圍，搶盡「峰」頭！看見現場多對新婚男女，27歲的Toby難掩恨嫁之情，表示每年的10月10日都是好日，希望30歲前結婚，婚後一年內生BB，問到與男友發展如何？她詐傻扮懵地說：「邊個？拍劇嗰個？哈哈！總之開心啦！（感情穩定？）個個朋友都穩定，如果影到我拖手都係結婚對象o架喇！」她表明不會秘密結婚：「呢個世界冇秘密，到時一定會講，但唔想喺香港搞，想去有陽光海灘嘅地方，之前家姐結婚都搞兩日，佢唔係圈中人都咁！」並表示其婚禮策劃公司的生意「搞大咗」，希望在香港及上海開分店，然後上市。

阿謙搵緊老婆

至於羅仲謙被問到感情生活時，Toby即插嘴提及「傅小姐」，分明將他與傅穎的緋聞擺上枱，令阿謙尷尬得口啞啞，無力招架的他沒有否認緋聞，只說：「想留番幻想空間畀大家！其實仲搵緊呀！（搵老婆？）女友同老婆都係。」並扯開話題問Toby可否介紹結婚對象。此外，當一眾新人拋花球時，Toby與阿謙竟不顧儀態爭位，阿謙更企在櫈上，兩人最終都成功搶到花球，但阿謙表示十年後才結婚。