由香港時裝設計師協會舉辦的《第22屆傑出衣着頒獎典禮》昨晚在上海舉行，現場衣香鬢影，星光熠熠！眾得獎者盛裝赴會，包括古巨基、廖碧兒、任賢齊、明道、影星鄔君梅、政界人士田北俊、名媛邱李茂琪、萬寶寶、王菲御用化妝師Zing與行政會議成員楊敏德。

被譽為「最美麗港姐」的朱玲玲，身穿品牌「源」的中國服擔任頒獎嘉賓，吸引不少賓客爭相合照，風頭甚勁！曾當選「傑出衣着」的她，大方分享穿衣心得：「我比較隨便，冇乜特別心思。（教老公着衫？）反而係佢教我，我打波時間較多，着便服多啲，但同佢一齊要着得斯文啲，因為要陪佢應酬。（賢妻？）你講咋！」

向來打扮出位的萬寶寶，昨晚罕有地密實。

朱玲玲（右）偕得獎者楊敏德一同打手印。

相信啟人識諗

她大讚老公的穿衣品味：「佢鍾意着Chinese。（感染埋你？）我本身都鍾意。」問到最滿意身材哪部分，她說：「細個有滿意嘅地方，但依家就冇。（着咩衫有信心？）簡單為主，我受唔到Wild（野性）同花喱碌風格。（老公唔畀性感？）太性感都過唔到自己嗰關。（遷就老公唔着高踭鞋？）唔關事，我打波打得多，膝頭唔好，所以少着高踭鞋。」

談及孻仔霍啟人涉醉駕及危險駕駛兩項控罪，朱玲玲不欲多談：「今日唔係咁好講。（囝囝緊張？）佢好緊張，我要支持佢。（叫佢戒酒？）佢自己會Take Care。（佢知錯？）佢咁大個仔，又讀過書，會識諗，我當然擔心佢，每個父母都擔心。（唔畀揸車？）咁又唔得。（請司機？）呢個唔係辦法。」

見證身材變遷

至於廖碧兒罕有地打扮密實，她說：「我覺得好Lucky，人哋畀我嘅衫，我都Carry到，好似台慶嘅Deep V同露背裝咁。（有身材Handle？）有啲衫係要有身材先Handle到。」她大讚國際影星鞏俐着衫好睇：「佢着長衫同旗袍好靚。（你有幾成似佢？）冇得比，佢Style好靚！」問到緋聞男友陳豪穿衣如何，她即讚不絕口：「佢着衫OK，模特兒出身吖嘛！（交流心得？）一般都係我問佢意見多。（佢身形邊度靚？）佢變得好快。（咁熟嘅？）唔係，睇電視都睇到，佢身形高，可以Carry好多外國品牌。（泳褲Look呢？）冇見過。」