無綫抄劇愈趨化境，觀乎今年所推出的劇集，多部都有抄襲之嫌！繼《飛女正傳》、《談情說案》及《女人最痛》等集百家之大成的「溝劇」出籠後，無綫似乎當觀眾意見是耳邊風，一於繼續抄！前晚首播由林保怡主演的新劇《讀心神探》，被網民鬧爆勁抄美國Hit劇《Lie to me》，不過今次手法相當高明，幾乎為觀眾奉上「全抄宴」，可省卻抄得不足反被砸腳趾的麻煩。無論人物角色或故事情節，《讀》劇與《Lie》劇儼如兩生花。

談到兩劇相似地方，不得不提林保怡的角色與《Lie》劇主角蒂姆羅斯同是因至親離去，產生童年陰影，兩者破案都喜歡睇片分析疑犯表情和小動作，可能是兩劇編劇心有靈犀！兩劇劇情同以前美國總統克林頓偷食事件做例子，以肢體語言來解構疑犯。《讀》劇其中一段情節，林保怡拿相片來舉證一對情侶的真偽，跟蒂姆羅斯在劇中所遇的案件一樣，甚至連宣傳片，《讀》劇都以《Lie》劇的反恐情節做Promote，實行向該劇全方位致敬。

廣管局接投訴

曾拍過《壹號皇庭》及《妙手仁心》等高收視劇集的前無綫監製鄧特希接受本報訪問時，不諱言老早已預料無綫有此一着：「我有睇過《Lie》劇，真係好好！當時睇完我就諗TVB幾時會抄呢套劇呢？果然又抄，但好奇怪點解佢會抄足！」他直指曾在明珠台播放的《Mentalist》也有抄《Lie》劇之嫌，不過該劇有新鮮元素，不致抄到一式一樣：「唔明TVB次次都畀人捉到，早前已經對TVB冇再心痛，因為習以為常！以前TVB喺亞洲好有影響力，依家就畀人鬧，好期待免費電視牌照開放後，可以令劇集質素提高！」而廣管局昨日也接到兩宗投訴，指《讀》劇抄襲《Lie》劇。