入行至今，除了曾與同門的張致恒傳緋聞外，Sherman的緋聞寥寥可數，故File亦算「乾淨」！去年憑《給自己的信》成功上位的她，工作量倍增，感情生活亦似有着落，早前更自爆有心儀結婚對象，但「真命天子」至今仍未曝光！

Sherman（左）和泳兒傾心事，期間Sherman愁容滿面，泳兒即將糖水分給對方潤番吓。	Shopping是女人的天性，難怪Sherman分外落力，揀完男裝再揀太陽眼鏡。	放大圖片

Sherman日前以型女Look到尖沙咀潮店「gi+」購物，未知是否久未血拚，甫進店內即風騷滿場飛，不停試墨鏡、吊帶裙、帽子及飾物等，最後扑錘購下頸鏈及墨鏡。其後，她轉攻男裝部挑選T恤及外套，途經男裝內褲專門店時，更不避嫌駐足研究，未知是否為另一半選購貼身用品？

泳兒（右）與Sherman互相幫對方揀衫，果然是好姊妹！

Sherman和泳兒（左）爭畀錢，結果泳兒爭贏。

落樓梯險仆倒

期間，早已相約齊齊行街的好姊妹泳兒突然出現，二人沿途密密斟，又互相替對方襯衫，滿載而歸的她們更在付款處上演一幕「爭畀錢」，結果泳兒成功爭贏，場面搞笑！不過，離開商場時，穿上厚踭鞋的泳兒落樓梯險些仆倒，幸Sherman眼明手快扶實，才未致大出洋相。經過一輪瘋狂血拚後，「孖公仔」轉往歎糖水滋潤一番，原本心情不俗的Sherman突然愁容滿面，除了用手機無聊玩自拍外，又不時狂發短訊，似乎心事重重，泳兒見狀即拍膊安慰，又將糖水分給Sherman品嘗，令對方稍現歡顏，最後結伴離開。

打鑼尋意中人

記者事後致電Sherman，問到是否蜜運中？她馬上否認：「心儀還心儀，但未正式有（男友）！（遇到Mr.Right？）物色中！（同泳兒傾感情問題？）都係Girl's Talk，未算係感情煩惱。」問到會否樂意替另一半買內褲？她說：「如果有男友，幫佢揀埋又有乜所謂呢？但依家冇嘛！」