為慶祝入行25周年，草蜢將於本月23日起假紅館開騷，昨日筵開10席宣布加開30日一場共8場。三子以軍Look現身，蔡一傑身穿百褶裙襯Leggings妖爆登場，製作人陳淑芬透露舞台設計近似幾千卡鑽石，凹凸不平，以考驗三子的舞技。她還從外國度身訂造價值5位數字的耳機送給三子，贊助商更大手筆送足金鮑魚，蔡一智興奮地說：「正呀！贊助商話每晚整定啲鮑魚去後台畀我哋食！」身旁的傑仔和蘇志威（阿細）說：「口果嚟啫！」

草蜢開香檳慶祝演唱會加場。

贊助商老闆送上足金鮑魚，令草蜢興奮莫名。

阿智對於加場大感開心，可解決欠飛債的燃眉之急，阿細則說：「自己又開心又擔心，開心加場，但擔心畀朋友追飛！」阿智透露25周年落重料，宣布請到軟硬天師擔任嘉賓，昨日以侍應Look出場的林海峰（林狗）抵死地說：「既然咁擔心，不如取消演唱會啦……我哋同草蜢唔係好熟，我哋冇睇新秀，聽林欣彤大。」

笑阿細似泊車師傅

林狗又取笑傑仔的造型似Sailor Moon，阿細似酒店門口泊車師傅，阿智則像曹達華，更大搞不文說：「唔知草蜢出道咁多年，佢哋出道嗰時，我應該喺爸爸度，未去媽媽度。」令全場爆笑！開騷在即，阿細坦言已練到六舊腹肌，對於軟硬搞寸Party，草蜢笑說：「雖然我哋把口唔夠佢哋，但我哋有萬幾人（觀眾）把口，或者到時用大力膠布唔畀佢哋講嘢。」