商天娥（娥姐）前日與李偉誠大婚之喜，來賓之多猶如無綫台慶般星光熠熠！除了載歌載舞外，曾華倩與曾志偉更輪流大爆娥姐情史，令全場嘩然！
從影28年的娥姐於圈中人緣甚廣，故畀面出席婚宴的藝人多不勝數，連28年前跟她同期藝員訓練班出身的劉嘉玲、曾華倩、吳君如、劉青雲、吳啟華及陶大宇等亦有到賀，婚宴玩到凌晨12時半才結束，並轉場再玩通宵！
志偉華倩唱雙簧
期間嘉玲、華倩及君如等一班12期訓練班同學上台恭賀新人，華倩竟趁機大爆娥姐當年曾與台上其中一位男同學拍過拖！由於事情從未曝光，全場嚇得鴉雀無聲，曾志偉即插嘴：「邊個咁不幸呀？」令台上的青雲、啟華及大宇勁尷尬，娥姐只好笑笑口打圓場：「呢啲嘢就唔好講啦！」由於娥姐婚前被爆曾暗戀青雲，故此頭號嫌疑人物是他！對於被指在婚宴上大爆娥姐情史，華倩昨日接受電話訪問時不停呼冤：「大家誤會晒喇！我講嗰個唔係娥姐，係台上另一個女同學！娥姐喺訓練班時已經好成熟，點會吼嗰班o靚仔，一定唔會係佢！」
娥姐避得過一次，終於避不過第二次！向來Natural High的志偉，除了踩司儀王祖藍及梅小惠不懂搞氣氛，經常搶咪發言外，當各人在台上互爆讀訓練班時暗戀對象，啟華因為最靚仔而獲最多女同學垂青，但志偉卻爆娥姐傾慕杜琪峯（杜Sir）！一向敢言的娥姐即時停了一停，然後當住老公面直認：「係呀！」全場爆笑！
新郎註冊吞口水
除了笑聲不絕外，婚宴亦有不少感動位，當中一對新人互唱情歌，娥姐更公開答謝父母：「我雖然係家中大女，但就係最遲嫁出去嘅一個……」終於不禁落淚，連志偉都被感動到流淚！進行註冊儀式時，新郎哥緊張到不停吞口水，被志偉取笑「係咪嗒得杯落」，但一對新人簽名時，志偉又與親友大叫「諗清楚先好簽呀」！志偉在婚宴還未結束就醉到不省人事，要人抬離現場送回家。