娥姐的契姊韓馬利及好友佘詩曼等，昨晚因要出席《公主嫁到》大結局活動而「忍痛」缺席好友婚宴，原本答應任婚宴司儀的阮兆祥，最終只能透過電視機送上祝福：「儂本多情、佳偶天成，翻叮一族，終成眷屬。」阿佘亦趁機祝娥姐白頭到老。
昨晚無綫原本只招待二百名戲迷，與《公》劇演員陳豪、陳敏之及李香琴等在商場睇大電視「過戲癮」，結果吸引逾千名市民圍觀，逼爆現場！席間，陳豪揚言有信心昨晚播出的兩集大結局收視能衝破50點：「我會着三點式，阿佘就着兩點式慶祝啦！」阿佘亦表示會盡力而為，望超越《宮心計》創下的紀錄。
對於與《巾幗梟雄2義海豪情》的鄧萃雯同被視為視后大熱，阿佘大方地說：「我對《巾幗2》都好有期望！（鄭嘉穎話睇好你！）多謝佢囉！」至於被傳因病被迫退休的琴姐，主動澄清謠言：「我啋過佢呀！嫲嫲冇癡呆症，我因為鍾意做戲先做到78歲，所以永不言休，但會減產，唔想自己咁辛苦。」