娥姐與Patrick昨晨完成接新娘儀式後，由酒店出發到金紫荊廣場影相，逾十人的兄弟團加上傳媒及看熱鬧的遊客，令娥姐寸步難行，雖然海邊大風吹亂其秀髮，但她並沒發忟憎，眾人逗留約十分鐘後離開。及至下午五時三十分，一對新人在酒店切結婚蛋糕，新郎徇眾要求錫娥姐面珠，大晒恩愛！穿上低胸晚裝露「事業線」的娥姐笑說：「乜好勁咩？都有啲啲呵？接新娘嗰陣Patrick講咗好多句『我愛你』，佢平時好少講，感動到想喊！老公仲喺婚宴上唱黎明嘅《愛比我重要》，佢尋晚死背歌詞，三年前佢唱過畀我聽，啲歌詞感動到我喊，今晚預咗化個超防水妝！」

Patrick徇眾要求錫錫娥姐，幸福滿瀉。	娥姐與老公到金紫荊廣場拍照時被「圍」，但他們並沒有炆憎。	昨晨出閣的娥姐笑到見牙唔見眼，話晒等咗48年，當然要笑餐飽。

覓真愛感謝神

娥姐又談到右手的天鵝形鑽戒：「呢隻求婚戒指老公設計、老公送，仲有隻錶添，都係天鵝嚟！因為我慣咗戴右手，陣間左手會戴結婚戒指！（幾多卡？）物質唔重要，對方同埋對方屋企人先至重要！老公想去日本蜜月，我怕日圓貴，想去歐洲。」據知天鵝形鑽戒價值14萬港元，而娥姐全晚首飾總值近七位數字。新郎聞言即再冧老婆：「感謝神畀一個好老婆我，頭先接新娘玩着比堅尼同掌上壓，好似綜藝節目咁！（結婚豪花幾錢？）唔講！婚宴用咗過百萬，開門利是都係開心隨意，九字尾！（四條九？）心意啦！」娥姐亦說：「我都好感謝神賜我好老公！」認真骨痹！

君如笑言沒有盛裝出席，免搶努力減肥的娥姐風頭。	早前計劃不「產」的嘉玲，不打算催娥姐生BB，一切順其自然。	劉青雲偕太太郭藹明出席婚宴，恩愛非常。

偉仔趕戲缺席

娥姐的訓練班同學兼好友劉嘉玲昨晚以黑色Tube Dress現身：「同娥姐好耐冇見，今晚重逢難得！（韋小寶老婆齊集？）係咩？我以為訓練班同學敍舊，不過小寶（梁朝偉）去咗拍戲！（訓練班時女同學有冇傾心事？）少女心事一定有，大個咗就唔同！（催娥姐生BB？）佢鍾意點都得啦！」而被編與嘉玲同桌的曾華倩則說：「訓練班同學敍舊嘛！（係咪特別安排？）唔知呢！好耐冇見，以前都有約食飯，近年好少。（娥姐當年暗戀邊個？）佢比較成熟，冇暗戀同學。」至於向來與娥姐老友鬼鬼的君如透露，因工作忙碌而未能經常與舊學敍舊：「以前同娥姐佢哋每兩年都會約一次見面，近年大家都忙！早排娥姐約我畀帖，好開心，佢好有誠意！（今晚個個鬥扮靚？）人哋結婚要尊重，娥姐都減25磅啦！」