以MZ藝名攻日的諸葛梓岐（Marie），早前與同屬日本環球的二人男子組合Hybridz合唱處女歌《Love Mail》，為此她更親自到東京拍MV，以窄身迷你皮裙騷長腿。原本萬事俱備，其處女歌亦即將在日本面世，她原定本月20日出發到當地展開連串宣傳，惟中日關係持續緊張，更有日本示威者包圍中港客旅遊車及在熱點遊行，據知，事業心重的Marie雖然心急攻日，並特意在兩個月前安排檔期，但其所屬公司為安全起見，正研究會否押後宣傳。

「地球人應該和平啲」

日前Marie在日本餐廳受訪時承認受影響，但暫未收到公司指示，她希望能如期赴日，故正考慮聘請私人保鏢以策安全，問到男友薛嘉麟是否擔心，她說：「佢會擔心，叫我小心啲，話如果當地有咩危險就唔好過去，命仔緊要。（叫佢陪你過去？）咁又唔需要，一向有女助手陪我，依家可能會請保鏢，希望呢件事盡快平息啦！」期間Marie狂擦日本刺身「洩憤」，由於近日不少日本示威者反華，她奉勸港人暫時不要到當地旅行：「希望自己國家嘅人，為安全起見暫時唔好去日本。（擔心？）有啲心痛，大家都係亞洲人、地球人，應該和平啲！」

諸葛與龍殿兒齊齊參與KOOKAI環保活動。

諸葛上月亦曾到日本行騷。資料圖片

否認「攝位」搶Baby工作

對於好姊妹Angalababy（楊穎）早前宣布暫別日本兩個月，問到會否趁機「攝位」，Marie說：「唔會咁諗，我哋不嬲唔會追擊大家，大家做嘅嘢唔同，我同佢係好朋友。（知佢唔去日本工作？）我知，不過我會正面啲諗，可能過一排會好呢！」另外，經常港日兩邊走的Marie，早前參與法國時裝品牌KOOKAI「Make Every Day a Greener Day」綠色生活展覽活動，宣揚環保：「我鼓勵大家多行樓梯，少用升降機，我會換咗對高踭鞋先行，唔係好易扭傷。」