無論服裝有幾靚，沒有穿適合的鞋子便變成「觀音頭掃把腳」！踏入秋季，女星搶先換上新裝，在這個夏秋交接期，天后王菲、婷婷、朱茵和舒淇示範利用不同鞋子配襯，突出個人品味！
王菲9分
評語：「阿菲不愧為天后級，估唔到Casual行街都着下季嘅至潮服飾，牛仔Jumpsuit配至潮紳士鞋，由服裝到鞋都配搭得恰到好處，好有Taste！完全凸顯到巨星風範。」
陳慧琳7.5分：穩陣冇驚喜
評語：「配襯得宜，但嫌太穩陣冇驚喜，一貫Kelly嘅風格，感覺似闊太，唔能夠發揮巨星魅力，亦展現唔到佢嘅身段，佢身形咁靚，其實不妨多作大膽嘗試！」
舒淇8.5分：順眼舒服
評語：「舒淇近年主力行Casual自然嘅路線，佢好清楚自己嘅定位，全套服裝流露到好舒服嘅感覺，睇落好順眼！」
周慧敏7分：嫌太保守
評語：「太過保守，雖然好靚但冇乜特別，未見驚喜。Vivian應該嘗試一啲色彩較繽紛嘅衣着，令人有新鮮感之餘，又可以令佢睇落後生啲！」
莫文蔚7分：散發女人味
評語：「Karen有潮流觸覺，而且揀嘅衫都能夠散發佢嘅女人味，整體配搭冇咩大問題，但直珠片襯格仔絲襪視覺上有啲奇怪，唔係人人接受到。」
謝婷婷8分：潮流Icon
評語：「婷婷好有潛質成為新一代嘅潮流指標，整套服裝配搭唔錯，配合到活動主題，對透視高跟鞋亦襯得好好。佢仲可以大膽啲，條吊帶裙可以裁短一級，令佢顯得更高貴。」
朱茵7.5分：配搭得宜
評語：「整體配搭唔錯，套衫能夠好好表現朱茵嘅體態，將佢本身嘅線條美都展現出嚟，惟髮型方面可以Set得後生啲！」
佘詩曼5分：過分平庸
評語：「阿佘可以再執得正啲，如果以呢套衫出席活動未免太過平庸，散發唔到一姐風格，而且款式冇咩特別，同人撞衫嘅機會好大。」
蔣怡4.5分：全身唔Match
評語：「可能蔣怡留喺台灣太耐，成套衫家鄉味濃郁，上下身配襯唔夠Match，對涼鞋更破壞咗整體Image，佢應該多啲留意時裝雜誌。」
盧頌之3.5分：似夜蒲OL
評語：「如果未搵到自己嘅Style，應該少着珠片較着數，全身裝束太散亂，唔夠歸一，整體形象未見高貴，十足放工夜蒲嘅OL。」
Profile
形象設計師AndyDaniel（姚志康）去年曾為黎明演唱會擔任形象顧問，與鄭希怡及衞蘭等多位圈中女星合作無間。