前組合Cookies成員區文詩（Angela）昨日假海港城舉行新碟簽唱會，父母、姊姊及圈中好友包括寇鴻萍、寧進及羽翹等專誠撐場。席間，主持人公開讀出Angela前男友張栢文的SMS內容，對方更署名「你的親人」以示支持，Angela說：「其實我同栢文好耐冇見，多謝佢咁支持我！（現任男友鈴木仁冇表示？）係我叫佢唔好嚟，費事喧賓奪主！佢有買我碟支持我。」談到舊餅碎統統冇影，Angela說：「鄧麗欣喺雲南拍劇，吳雨霏同楊愛瑾有工作，傅穎就一直冇聯絡。」
至於曾捲入無綫高層涉貪案的寧進透露，目前主力打理電單車行生意，希望待事件結束後重返無綫工作：「其實我已經冇事o架喇！不過都算係有關連人士！（見過陳志雲？）有！我同陳志雲、叢培崑、錢國偉佢哋都有食飯見面，我相信陳生係無辜！」