國際女星楊紫瓊昨日聯同鄭雨盛、余文樂、監製吳宇森及導演蘇照彬出席電影《劍雨》記者會。現場所見，楊紫瓊心情大靚，但大會指她事前已表示不會接受傳媒訪問，似是想避談弟弟楊南日與蔡慧敏的緋聞。

楊紫瓊與鄭雨盛在記者會上十指緊扣，望鏡頭眼神又一致，盡顯友誼默契。

放大圖片

席間，鄭雨盛透露能與楊紫瓊合作深感榮幸，大讚對方很有個性、有責任感，凡事都做到最好，令他印象深刻，他更坦言曾經想過找女友可不可以有楊紫瓊那樣好心地及好性格。此時，身旁的余文樂即笑指他「太遲了」，因楊紫瓊已有未婚夫托特，鄭雨盛聞言未有放棄，更公開問楊紫瓊：「那可不可以來生約定？」氹得楊紫瓊十分受落笑不停，二人隨即十指緊扣拖到實，全場拍掌。

笑吳宇森「緊張爸爸」

楊紫瓊大讚鄭雨盛很勤力，苦背普通話台詞之餘又不時練劍，令她亦不敢偷懶。另外，她又大爆吳宇森是「緊張爸爸」，很緊張愛女吳飛霞今次的演出：「片場有個爸爸好緊張，見到有人跌低，未知係咪自己個女就飛埋去，都未見過佢咁好身手。」吳宇森亦承認：「係有啲擔心，個女吊威吔我都要劇組保證條威吔唔斷，但係個女嫌我嘮叨，話要趕我出去添！但見到個女已經成長，好開心嘅。」對於票房，吳宇森不太擔心，因得知《劍》片賣埠成績理想：「《赤壁》用咗幾千萬美金去拍，都冇呢套賣得咁好，初頭有啲妒忌，但其實兩部戲都係自己嘅。」