本文重點
自為成龍誕下女兒後，吳綺莉移居上海，久未露面。昨日她身穿Escada連身裙出席護膚品牌La Mer酒會，明顯心廣體胖，問到是否再懷孕，她笑言只是早睡早起，並強調雖有追求者，但沒有拍拖。問到擇偶條件是否要與女兒相處得來，她說：「呢樣好重要。（個女嗰關難唔難過？）好難講，呢啲人夾人，不過佢好少管我，佢出年讀中學喇！（灌輸性教育畀佢？）唔需要，佢哋好叻，唔同以前嘅年代，識得用電腦上網，可能識得多過我。」
清楚父親身份
甚少談及成龍的吳綺莉，昨晚罕有地有問必答，問到女兒有否問起Daddy的事，她說：「唔會，都好多年前嘅事，冇乜特別要再問，要講細個都講晒。（可能佢細個唔明？）依家嘅小朋友好成熟，7、8歲就明。（知唔知Daddy咁出名？）對佢嚟講冇乜秘密。（即係知Daddy係成龍？）基本上佢乜都知。」
成龍最近屢遭批評，問到女兒是否知情，吳綺莉說：「佢唔識中文。（你有冇留意？）聽過吓，但事不關己，己不勞心，要顧好自己先，我都好忙，唔會留意八卦新聞！」她強調做人要向前望：「過去咗就過去，仲搵幾十年前嘅事嚟講，對小朋友唔健康！（個女有冇提出見Daddy？）冇，我會教佢有啲嘢發生咗就發生咗，冇嘢係完美，一個人應該諗住佢有啲乜嘢，而唔係諗自己冇啲乜嘢。」至於會否教女兒帶眼識人，她說：「唔使教，我會教佢每件事有好與唔好，冇話啱與唔啱，視乎你用咩角度睇。」