甄子丹與老婆汪詩詩是圈中公認的恩愛夫妻，外表威猛的他原來樂意替老婆挽手袋、陪購物，好男人成形。俗語謂「男人不壞，女人不愛」，但好男人則絕對是搶手貨，問到可曾被女星埋身？甄子丹說：「咁多年唔發覺，我都冇緋聞。（暗地多情史？）我好宅男，比葉問更葉問，鍾意留喺屋企，珍惜屋企人，享受平淡生活，所以啲新聞成日話我同老婆Shopping，幫佢拎嘢，如果真係有（女星埋身），科技咁發達實有人知啦！女星都好專業，唔需要做呢啲，我作為好丈夫、好爸爸，會將老婆仔女放喺口中。（刻意提起家庭防飛來蜢？）唔係，家人最重要，男女合作唔一定係互相埋身，仲有友情。」
好打唔代表囂
憑功夫打出名堂，號稱「宇宙最強」，更常被指囂爆，甄子丹即謙虛地澄清，指是傳媒封號，他說：「冇所謂，娛樂大家，得啖笑，好唔好都係人哋講，最重要係自己做乜。」
問到這名銜有否令他變得囂張？他笑說：「練功嘅人起晒弶，好有能量，令人頂唔住，覺得做武打係囂，我多年嚟刻意努力改變形象，打得唔代表囂。我會形容自己係隻好懶嘅獅子，唔郁嘅，因為我係獅子座，老婆話我行得好慢，咁唔使我快、唔使踩油就梗係要留體力，拍打戲先踩油，平時就放鬆、懶洋洋。（唔認囂？）唔認，我個人真誠、直接、唔兜彎。（易得罪人？）聽者有心，講者無意。（係咪衝動派？）後生時會，依家做咗咁多年，有智慧，講嘢會衡量會唔會傷害到人。」
老婆讚露股Fit
甄子丹強調只接拍傳遞正面訊息的電影，演活一代宗師葉問的他果然充滿正義感，但在新片《精武風雲．陳真》中，他卻突破性地露股演出，難道不擔心影響形象？他說：「唔係賣弄色相，男仔籮柚啫！場戲需要，又唔係床戲、情慾戲，講個犯人畀人捉去行刑，冇理由着條短褲。（克服心理關口？）唔使，知道劉偉強導演唔會拍嗰啲（色慾）戲，佢知我唔拍情慾戲，嗰場戲好健康，又唔係拍特寫。（露股搶焦點？）唔介意成為話題。（拍之前勤練股肌？）刻意操Fit身形，但唔識操Fit籮柚，可能練功夫會結實啲。（事前向老婆交代？）唔需要，佢睇完話幾好幾Fit添！（將來被導演打動，會唔會正面全裸演出？）冇可能，又唔係拍A片，拍戲唔只對自己負責任，仲要對社會交代。」