近年雄霸天橋一姐地位的熊黛林（Lynn），與數年前隻身由南京來港時身價不可同日而語，出名顧家的她坦言當初來港是為了媽媽，希望家人得到更好生活，儘管最初面對陌生的環境，人生路不熟，她也得硬着頭皮抵受寂寞。今日，Lynn終於守得雲開，愛情事業兼得。對於眼前所擁有的，Lynn自覺幸運，並感恩地說：「我覺得幾順利，同埋幾滿意同幸運，Timing好重要，雖然同南京冇得比較，屋企始終溫暖啲，但喺呢度做嘢都好開心。」
郭富城定婚期
關於Lynn的花邊新聞不少，但最吸引的還是她與郭富城傳足四年的地下情，多次被拍得「攻城」、「打邊爐」，兩人關係早已被外界認定。誠如郭富城所言：「我的感情事喜歡低調。」因此Lynn每次都只有面紅耳赤輕輕帶過，但「名分」對女人都是重要的，可幸城城近日「下旨」表態計劃結婚，相對地亦給了Lynn一個「嫁期」。對於被指恨嫁，Lynn即嗲聲嗲氣地說：「我唔恨嫁，隨緣啦，哈哈！雖然我個人喺工作方面比較心急，咩都想快啲完成，唔想嘥時間，但係愛情就要慢慢嚟，我聽過有啲人識幾日就結婚，我覺得好唔安全，萬一之後再發現咗啲乜嘢，就會後悔，我對愛情唔想咁快，覺得決定咗就唔可以後悔，希望了解多啲、慢慢嚟。」
食米線唔係Cheap
Lynn坦言曾希望30歲前結婚，生BB組織家庭，但際遇改變，她對結婚亦不再心急：「細個時真係諗快啲結婚，希望30歲前，依家冇咩進展，所以唔會再畀個限期自己，好大壓力o架！加上覺得事業幾好，依家係收成期，辛苦咗咁多年，唔想咁快就放棄。（城城等到你咩？）有人等我咩？其實我心目中結婚係一定嘅事，生兒育女都係必要。」
過去兩年的生日，Lynn都被拍得與城城甜蜜共度，今年她事先張揚要往外地工作，並以「好彩」來形容：「其實我好怕畀人影到，好似我鍾意去銅鑼灣食米線，啲雜誌影到就話我食Cheap嘢，講啲好難聽嘅說話，我依家好怕出街，見到樓下有人等，我寧願幾日唔出街。」做天王嫂有一定壓力，Lynn直言已慢慢習慣港式生活。