岑潔儀與家人自幼住在西貢區，談起童年往事，她說：「細個嗰陣同家人住喺山區附近，經常同阿哥及小朋友到山上玩囉！嗰時好鬼百厭同大膽，試過玩蛇同蟾蜍，好彩冇事，但就畀屋企人鬧到飛起。」

岑潔儀對「龍鬚糖」美食情有獨鍾。	母親當年常與Zoey行街及參加活動。	身材Fit爆的Zoey最愛做運動。

到了求學時期，Zoey經常到深水埗區閒逛，尤其喜歡行商場：「因為讀書嗰陣零用錢唔多，所以行商場時通常齋睇唔買，嗰時我鍾意去溜冰，因為覺得溜冰嘅姿勢好靚，感覺幾自由。除咗溜冰外，我都鍾意玩夾公仔，嗰時好犀利，百夾百中，同學仔都叫我做『夾神』，哈哈！」

Zoey求學時常常逛深水埗區。	與哥哥感情甚篤的Zoey，其小妹妹樣貌，清純可愛。	女仔至愛玩夾公仔遊戲，Zoey亦不例外。

Food Court傾心事

另外，Zoey閒時最愛與同學仔放學後到Food Court相聚，她說：「同女同學多啲啦！大家會『Girls' Talk』，我哋會一邊食嘢，一邊傾吓心事，同埋一齊做功課，有乜唔識大家都可以互相提點。」

少女情懷總是詩，Zoey讀書時亦爆過「巴士情緣」，她說：「嗰時每日都搭巴士返學，成日遇到一個男仔，佢好高大靚仔，有啲似謝霆鋒，讀隔籬學校，見得多咗，有次佢走埋嚟撩我傾偈，咁我哋就做咗朋友，之後都有同佢拍拖，嗰時我哋日日相約喺巴士站等，佢仲買埋早餐畀我食，好Puppy Love。」