本文重點
中秋過後秋意漸濃，圈中女星仍以性感打扮爭妍鬥麗，其中剛宣布懷孕的李嘉欣可謂喜上加喜，被時裝設計師郭慶彬大讚秋系衣着冇得彈！相反名模Ana R.扮瑪麗蓮夢露則稍為失色！
高分派
李嘉欣撞色勁搶眼
評語︰「裙玩撞色效果好新鮮，橙色特別搶眼，條鬆身裙好襯剛宣布懷孕嘅嘉欣，佢着落唔似孕婦裝，睇落冇發脹，又可以遮埋個小肚，而加埋對手套好有秋天感覺，皮做手套秋意味更濃。」
評分9分
范冰冰中國娃娃味
評語︰「古典美人造型，有中國娃娃味道，而且紅色連身裙好搶眼，令身形更加修長，衫袖設計又有層次，成條裙簡單又有啲突出，不過貼地晚裝前面拖地長咗少少，如果剛貼地就更Perfect！」
評分7分
瑞莎黑Boot顯秋意
評語︰「綠絨裙襯黑色Boot好有秋天感覺，如果換咗高踭鞋就變咗夏天，因為佢有標準身形，着上身好靚，好有女性味道，而且開胸裙冇逼爆效果，更加順眼。
評分8分
失手派
李彩華論盡又臃腫
評語︰「紅色晚裝嘅設計麻麻哋，唔夠靚，上身Cutting好臃腫，下身睇落好論盡，加埋少少金色頭髮，有啲娘。」
評分3分
Ana R.扮夢露失色
評語︰「白色裙其實好襯佢，但佢扮瑪麗蓮夢露唔似，假髮完全唔Match，今季裙興呢種尷尬長度，但如果佢着更高嘅高踭鞋，最好有4、5吋，將個高度拉高就更好。」
評分4分
樂基兒層次感太多
評語︰「佢整個打扮屬秋季系列，感覺太多修飾太花巧，格仔上衣同蛋糕裙唔襯，層次感太多眼花繚亂，冇咗焦點。」
評分4分
穩陣派
張栢芝優雅發光芒
評語︰「着出優雅美觀，勝在身形標準，而且有修長美腿，感覺好舒服，稍嫌下身設計複雜有點論盡，令注意力分散，但仍散發巨星光芒。」
評分6分
汪詩詩簡單而隆重
評語︰「素色連身裙打扮穩陣，但有簡單而隆重嘅感覺，露肩凸顯骨架線條和修長美腿，但可以試吓戴水晶或鑽石頸鏈，令整個人冇咁單調。」
評分5分
10分為滿分
設計師Profile
郭慶彬（Ricky Kwok）加入時裝界8年，以廣告形象指導為主要工作，曾任名模樂基兒和熊黛林的形象指導，並在銅鑼灣開設時裝店，主要售賣日本和英倫時裝。