簡華捷師傅與葉問得意弟子、李小龍授業師兄「講手王」黃淳樑交情不淺，黃淳樑當年四出講手，與人實戰對打，寓戰於操，簡師傅也曾多次跟隨師兄見識見識，簡師傅說：「好多人都知樑哥係『講手王』，當年佢帶埋我同一個有個華探長老竇嘅師弟張卓慶四圍搵人講手，有時去人哋啲館，專揀嗰間館啲師兄，猛彈佢哋啲嘢唔得，嬲起上嚟就打得成o架啦！我做細嘅多數企後面睇，師兄10次贏8、9次咁啦！詠春個名短時間內多人識，多少都同呢樣嘢有關。有次樑哥帶我哋兩個踩入警察宿舍搵人講手，師兄打到嗰個人頭破血流，我哋先識驚，話晒嗰度都係警察地頭，就算師弟個華探長老竇嚟救，佢嚟到之前點都唔少得先捱身打啩？好彩嗰次我哋跑得快。」