雖然已是半世紀前的往事，但簡師傅說起初見葉問的經過，情境仍歷歷在目，他說：「有次同同學郁手郁腳，佢用詠春打贏我，我叫佢帶我去拜師，上到去見到葉問同班師兄弟圍喺露台，望住吊喺對面樓嘅大冬瓜，原來喺度研究點樣射個冬瓜落地，我同學話：『師傅，阿捷射雀仔好叻o架！』講完就推咗我去露台，我用丫叉一射，大冬瓜即刻墮地，葉問笑到哈哈聲，拍拍我膊頭叫我『大隻仔』，對我印象唔錯，之後我就拜咗葉問為師，一學7年，直至我去歐洲為止。」

為街坊伸張正義

葉問的童心拉近了與一班徒弟的距離，亦令其身教更具感染力，簡師傅說：「師傅除咗有童心，仲好有俠義心腸，有次飲完茶，見有個男人喺街打女人，佢出聲阻止，個男人望望師傅話：『阿伯冇你嘅事！』師傅就話：『打女人就唔啱，就係關我事！』個男人可能見師傅一副阿伯款，衝埋去想打佢，師傅三兩下手勢打到個男人流到成面血，個男人平日出名蝦蝦霸霸，啲街坊大快人心，個個拍爛手掌，啲豬肉佬同生果佬仲間唔中送啲豬肉同生果畀師傅。師傅呢次路見不平，無形中令詠春一傳十、十傳百，好多人上嚟搵師傅學嘢。」

葉問弟子中名氣最響的，當然是李小龍，簡師傅說：「小龍行路頭岳岳，又鍾意着花哩碌嘅衫，我哋幫佢起咗個花名叫『岳飛』。有次同佢行尖沙咀，有班飛仔睇佢唔順眼，想打佢，嗰時小龍跟師傅好短日子，班飛仔人多，佢好蝕底，咁啱有部巴士經過，跳咗3、4個人落嚟，原來係我哋啲師兄弟，嗰個年代好多巴士佬跟師傅學詠春，因為嗰時啲人搭巴士好狼死，有啲恃住生得大隻唔畀錢，有啲閂埋閘都夾硬衝上車，仲郁手郁腳打啲拉閘佬，所以好多巴士佬嚟學嘢。之後陸陸續續嚟多3、4架巴士，架架都跳3、4個師兄弟出嚟，班飛仔見我哋人多，驚到雞飛狗走，小龍見打唔成有啲失望，但佢啲功夫根本就未得！」