陳奐仁（Hanjin）及歐陽靖（MC Jin）前晚在九展舉行《Double Happiness演唱會》，衞詩、王梓軒及夏韶聲撐場。擔任嘉賓的GiGi穿黑色泰山裝，勁騷靚腿曲線，並與Hanjin合唱情歌，其後更即席與Hanjin抱抱及激讚對方：「佢把聲真係好好聽，平日喺Studio我睇唔到佢，淨係聽到佢把聲，佢會話：『GiGi，你頭先嗰度唱得好甜呀！』聽到真係好冧，望住佢個樣，仲冧！」她笑言Hanjin的外形很似卡通人物多啦A夢，又大讚他抵錫又可愛，調皮的Hanjin即打蛇隨棍上向GiGi索吻，而GiGi亦十分識做地送上飛吻！

唱《媽媽》報親恩

而MC Jin亦首度開腔獻唱黎明的經典金曲《對不起我愛你》，獲觀眾大讚，但他遺憾黎明未有捧場。尾聲時，Hanjin在台上邊彈結他邊跳，差點仆倒出醜，驚魂未定的他爆粗說：「我頭先差啲仆X呀，真係仆X呀！」嚇得MC Jin急急為他解畫：「佢話仆親！」而Hanjin亦尷尬地抵賴是有「懶音」問題。事後，Hanjin自爆獲媽媽捧場：「不過媽媽鍾意低調先冇講，所以頭先喺台上唱咗《媽媽》送畀佢！」