女子組合Freeze成員陳樂榣（Alley）因家庭問題曾向甄穎珊（Carisa）借錢，近日有報道指Alley未有清還債項，加上石詠莉（Sukie）加入戰團，令兩姊妹關係愈鬧愈僵。昨日Carisa與Sukie帶同公司3名新人出席《愛心送暖迎中秋》活動，唯獨未見Alley到場，Carisa與Sukie指她有私事在身因而缺席，但Carisa似暗寸對方冇善心：「今次係慈善活動，都係自發性參與，其實個個都有自己嘢做，我舖頭直頭唔做生意過嚟，有時唔係純為搵錢。」

陳樂榣早前接受訪問時承認財困。資料圖片

甄穎珊（右起）與石詠莉偕三名師妹出席活動。

問她們與Alley關係如何？Sukie直言大家只是「Hi、Bye」朋友，而Carisa則說：「我永遠為佢打開一扇門，要睇佢自己點諗。（還晒錢？）仲有啲，佢話佢每個月都有還，但係今年只係還過一次，其實我都唔想佢辛苦，所以根本冇協議點還，我叫佢有多餘先畀我！」

Alley揚言已還清欠款

記者昨致電Alley，她表示公司從未通知她出席活動：「我都係啱啱Fans留言問我做咩唔去先知。（佢哋夾埋對付你？）唔知，好多人咁認為，但我只係想做好自己下個月個畫展，根本冇時間去理呢啲是非。」對於Carisa表示樂意與她言歸於好，Alley即勞氣地說：「係佢早排傳短訊畀我話唔當我係朋友，呢件事搞到咁不愉快，同事都差啲做唔成，仲做咩朋友呢？希望佢唔好喺傳媒面前講一套，實際又做另一套！」她強調報道出街後，已即時還清欠款，也認為事情應該告一段落：「唔想大家再有咩轇轕！」