自從陳志雲被正式落案起訴後，不少無綫藝人都劃清界線，但王喜昨日在內地完成工作後，堅持趕返港陪志雲出庭，橫風橫雨亦無阻決心：「只係盡朋友之義，趕返嚟係表達一份支持，冇咩值得表揚。（其他愛將冇晒影？）可能做咗大家唔知呢！係我比較表面啫！（唔怕影響同無綫關係？）我諗唔好為未發生嘅嘢擔憂先，我對陳生好係私事，同無綫係僱傭關係，冇人勸我唔好幫陳生，對陳生好嘅唔只我一個，好多市民、朋友都託我問候陳生。」
王喜透露送完志雲返家後，便去拜佛，未知是否誠意感動上天，令佛寺重開。由於雨勢頗大，他要赤腳行上山，當行完108個五體投地大禮拜後， 落山時感到腳軟：「我去咗大嶼山拜大佛為佢祈福，遇上大佛維修佛寺關門，五點重開，半個鐘內我行咗佛教大禮拜、108個五體投地，希望可以為陳生祈福！（咁做好難得？）我要感謝陳生畀機會我對佢好，佢被調查呢半年，係好大考驗，有人問我可以為陳生做到幾多，我敢講去到最極端情況，我可以攞我層樓去賣幫陳生打官司！」
另外，志雲契姐Ann姐前晚在功德林設齋宴，與志雲及其好友預祝中秋，志雲心情輕鬆，胃口不錯，對於喜歡的冬菇、西蘭花及齋鱔等大快朵頤，更反過來安慰朋友：「唔使擔心我，一切交咗畀主。」氣氛雖然輕鬆，但志雲好友實則憂心忡忡，齋宴至晚上十時完結，志雲返寓所休息。
寧進唔使擔心
早前獲廉署撤銷保釋的藝人寧進表示有SMS志雲：「佢好快覆番『多謝關心，唔使擔心我』。（唔陪出庭？）王喜同陳生係Best Best Friend，我係Best Friend。（避忌？）少少，我去都冇用，王喜陪佢好放心，佢唔去我就去！我同陳生間中有見面，會約佢食飯。」而前無綫製作主任錢國偉昨日現身無綫員工餐廳：「返嚟探同事，冇聯絡志雲，我未收到消息傳召我上庭。（同何麗全跳槽？）我係自由身，有同內地、美國公司傾合作演唱會、電影，經濟上冇問題。」