苗僑偉（三哥）、吳卓羲、郭羨妮（Sonija）及賈曉晨（JJ）等昨日為無綫新劇《抉宅男女》試造型，剛從橫店拍劇返港的Sonija明顯清減不少，對於新劇被指抄《蝸居》，她說：「人哋話係咪係囉！就算係抄都要做得好過佢，我都有睇《蝸居》，內地回響好大！」她預告新劇初段會以素顏上陣扮師奶：「我唔擔心高清令皮膚問題現形喎，唔使化妝，慳番啲時間仲好！」

吳卓羲與賈曉晨將有不少對手戲，未知會否傳緋聞？

三哥及Sonija率《抉宅男女》演員試造型。

轟政府賣貴地

而三哥則「先發制人」指新劇若與內地熱爆劇《蝸居》雷同，實屬巧合：「我哋唔係抄，各有特色，不過預咗網友批評！事實上，香港居住問題好嚴重！」他認為現時樓價太高，泡沫將爆破，並非置業時候：「政府賣到啲地咁貴，神又係佢、鬼又係佢，我贊成復建居屋！」

至於劇中飾演投資經紀的吳卓羲坦言，現實中不懂投資，要向媽媽請教及上網搜集資料。而昨日28歲生日的JJ，原來已入行7年，令她感觸良多，她更坦承緋聞男友沈震軒有送生日禮物。