21/09/2010

播放本新聞相關短片

城城5年後結婚恨生夠兩個

現年44歲的郭富城曾發表不婚宣言,令緋聞女友熊黛林(Lynn)恨嫁的心願一度落空。昨日城城罕有風騷地公開Lynn的女友身份,並揚言計劃5年後生兒育女,最好生兩個!

城城和Lynn的4年戀情漸入佳境,Lynn每次提起城城均甜笑,早前有傳城城帶同Lynn出席好友張智霖(Chilam)生日會,令天王嫂身份進一步提升。城城昨日出席《新浪微博一周年.童鞋星級禮》,未知是否他剛在賽車比賽凱旋歸來,心情特別靚,不僅恭喜剛宣布有喜的李嘉欣,連一向對結婚甚為「抗拒」的他,亦轉口風表示計劃生兒育女!

記:記者 城:郭富城

記:有冇恭喜李嘉欣?

城:有!其實佢當年參選完港姐後第一個Job,就係同我合作拍《都市方程式》,好開心佢有個美滿家庭,依家有埋BB。

記:知唔知佢佗仔定女?

城:唔知,不過聽人講肚細生仔,肚大就生女,佢有機會係仔,似係仔。

記:咁你幾時生個小Lynn或者小城城?

城:(一臉甜笑)其實我一直好鍾意小朋友,我相信我嘅Fans同朋友都知道,尤其我見到Chilam同沈嘉偉啲小朋友,我一見到就會係咁同佢玩。至於我自己呢?我相信一定會結婚同生小朋友,我都有呢個計劃,但唔係呢段時間。

承諾做個好爸爸

記:係咪有Plan同Lynn生仔?

城:(沒有正面回應)我都話未有時間Plan,究竟將來幾時做呢樣嘢,如果我有一日結婚,我一定喺微博話畀大家聽,就算我有個Plan,對方都要有呢個思想先得嘛!依家貿貿然諗呢樣嘢係未知嘅!

記:同Lynn有共識?

城:我自己都未有呢個Plan,(佢)點會有呢個Plan?

記:咁你同Lynn講吓囉!

城:(非常風騷)唔得嘅,講吓有責任o架!我唔敢。

記:Lynn都好鍾意小朋友喎!

城:唔知喎,你問吓佢啦!但我其實好鍾意小朋友,啲人成日問郭富城係咪一個好爸爸,我可以答你我一定係好爸爸,相信有一日成家立室,太太會有BB,我一定係個好爸爸。

記:可以先生仔後結婚?

城:(嚴肅)我個人比較傳統,唉!唔好講咁多喇!唔好咁快講呢啲嘢!(趁機轉話題)好多時最想生仔,但就生唔到,變咗生女,但有啲可能冇所謂,又生到仔,我識十個朋友有九個都係咁。

爆沈嘉偉繼續追

記:你指沈嘉偉?

城:講個秘密畀你知,嘉偉個人冇所謂,佢好鍾意大家庭。

記:沈嘉偉會再追落去?

城:係呀!佢愈多愈好呀!而我自己就鍾意兩件(兩個BB)。

記:Lynn要趁嫩生BB喎!

城:大家真係畀好多意見我,大家好關心我嘅感情生活,但我嘅感情事想低調,我希望畀多五年時間我啦!

記:你都事業有成,仲想追求乜?

城:又係嘅,我知大家關心我,咁就四年半啦!其實我想做音樂劇。

記:生咗BB都可以o架!

城:我係好難分心嘅人,如果我有家庭,我要照顧小朋友。

記:學友都係咁啦!

城:唔同o架嘛!我又要賽車。

對於城城計劃五年後結婚生仔,Lynn經理人Kim說:「嗰啲問題唔應該問我,我哋冇回應。」

專案組