年屆40歲的李嘉欣昨日身穿鬆身裙、腳踏三吋高踭鞋出席在海運大廈舉行的《新浪微博一周年．童鞋星級禮》活動，宣布成功造人的她，全程有多名保安貼身保護，經理人陳善之亦親自扶她上台。為免懷孕的嘉欣過分操勞，大會更細心安排椅子讓她坐着做訪問，盡顯星級待遇。
李：李嘉欣 記：記者
記：係咪八月初出席活動嗰陣已經知有咗？
李：係呀！（幾多個月？）依家一出街就好大壓力，我又唔想講大話，如果我講出嚟，你哋又跟，我又辛苦，你又辛苦，所以唔想講！（過咗三個月？）係！（四、五個月？）你哋估！
記：家人好緊張？
李：冇！我同老爺奶奶講嗰陣，佢哋講咗兩句說話：「生仔生女，唔係我哋（指老爺奶奶）決定，千祈唔好有壓力！你記住，生唔生都好，兩個生活得開心先至重要，生BB重要唔過開心生活！」令我好感恩！之前啲報道話佢哋有BB就對我好，冇BB就差，啲關係講到唔好！將我「妖魔化」就好，唔好連兩位咁好心哋嘅長輩都咁講，佢哋係最好最開通！
剖腹分娩唔使進補
記：係咪佗仔？
李：其實男同女我哋都開心，依家我唔係100%知道，唔想講出嚟，一陣出嚟如果結果唔同，變咗耍大家！（即係生仔？）冇咁講過！
記：照超聲波有冇遮咗BB器官？
李：冇遮住！我完全冇諗過會有BB，幾意外吓！搞到公司要推Job！（去英國生BB？）冇啲咁嘅事！我希望將人生大事都喺我最鍾意嘅香港發生！
記：胃口點？
李：正常，開頭發現有咗就食嘢，依家變番正常人體重。（食乜？）唔講！唔想畀貼士你哋估！（仲有冇嘔？）冇！好開胃。（剖腹？）係！開刀生。
記：老公有咩表示？
李：冇！佢成日整蠱我！依家全屋最惡係媽咪，佢問我點解今（昨）日要做嘢，我大肚都拍咗三個廣告，令佢好不滿，佢今（昨）日都唔知我着高踭鞋。
記：奶奶煲補品畀妳？
李：冇！唔使！佢一煲嘢都冇煲過！其實唔使點進補！佢哋好關心我，啲雜誌講到我平時冇嘢食，一有咗就食山珍海味，冇咁嘅事！佢哋年紀咁大，講得出嗰兩句說話，已經當咗我係女！
記：傳人工受孕？
李：如果係就唔會失晒預算，又要推Job！之前原本去歐洲做嘢，準備出發時先知有咗！上天忽然送畀我嘅「禮物」，冇人諗到，個客Book晒所有嘢，惟有推Job，萬二分抱歉！依家有兩三個Job冇辦法做，有啲工作等到出年。（媽咪叫停工？）其實已經接咗三個Job，條件係留喺香港，如果有人搵我，而我冇被禁錮都想做，似Kelly（陳慧琳）做到生嗰刻。
亨亨嫌腫拒買戒指
談到前天嘉欣與許晉亨到灣仔福臨門晚膳，湊巧劉鑾雄亦闔家用膳。
記：有冇見到劉先生？
李：冇！係記者當時講畀我聽，我先知。
記：劉先生恭喜你？
李：應該冇！今（昨）日第一次講件事。
記：黎明知唔知？佢之前出席活動被問到你有喜就急急腳走？
李：佢係唔係都急急腳走！
記：老公知道你有咗點反應？
李：我同佢講話要取消去歐洲做嘢，佢問我係咪病咗，我話畀佢知嗰陣，佢停一停，就話『係呀』！語氣有啲唔同，佢扮吓有型，按吓自己情緒，唔會懶高興！佢成日整蠱我，有次我話見到有隻戒指好靚，平時佢會買畀我，但嗰次佢話遲啲你十隻手指變到香腸咁腫都戴唔落，不如走咯！
記：想老公送乜禮物？
李：做番自己就係最好禮物。
記：擔心做高齡產婦？
李：係你就係你，高齡低齡冇分別，我梗係希望順利，但每一個有BB嘅人都冇得擔心，條路唔係咁易行。
記：兔BB？
李：我知道出年二月四日之前係虎年，之後就係兔年，但呢啲話唔埋！
活動結束後，嘉欣乘車離開，沿途有十多人士護駕，座駕其後直駛愛巢「曉廬」。另外，她於昨日傍晚六點半，在微博向「童鞋」宣布喜訊，獲逾三千名粉絲留言恭賀。