年紀漸長愈難動情

出道時被指寸爆的樂仔，近年脾氣收斂了不少，負面新聞大幅度減退：「EQ比以前高咗！依家遇到狗仔隊，我就話不如企定畀你哋影，影完大家都收得工！有啲嘢係你控制唔到，嬲都冇用！」對於被指與沈嘉偉、張智霖及郭富城「埋堆」博上位，他說：「做朋友無分等級，起初我都有因為咁唔開心，好彩佢哋安慰番我，叫我唔使介意。」甫入行時緋聞纏身的他，挨近「三字頭」後緋聞卻愈來愈少：「愈大個愈難動情，要考慮好多因素！」他坦言最近曾為神秘女子動心，但並沒行動：「愛情無界限！我唔會局限擇偶條件。（姊弟戀？）冇問題！當然大十幾廿年唔得，兩、三年就OK！」

隔籬飯香拒評演技

入行至今，樂仔挑戰過不少角色，雖然他曾榮膺「富川影帝」，但同時又被指是「票房毒藥」，難得他相當豁達：「演員只係電影其中一部分，仲有導演、劇本同宣傳等因素，唔會寫包單話一定收得！」他續說：「靈丹同毒藥都係稱號，盡咗本分就得，邊個唔想部戲大收呢？」問到對自己的演技有何評價？他說：「好少留意，導演收貨就OK！好多時首映先第一次睇晒成套電影，我鍾意『隔籬飯香』，睇自己好悶！」

後記：唔敢撈過界

模特兒出身的樂仔，向來潮爆，與日本著名潮人NIGO分屬老友的他，否認想染指潮流生意：「冇諗過搞潮人生意，我了解過，力不到不為財，我唔係嗰瓣人，因為做生意要全心全意，唔想將鍾意嘅嘢變成負擔！」