為了回饋粉絲，容祖兒（Joey）昨日再為新碟《空港》舉行簽名會，雖然300個簽名籌早已派光，但唱片舖依然人頭湧湧，非常墟冚！對於一連兩個星期為唱片舉行簽名會，她笑說：「要答謝歌迷對我嘅支持，為新碟我好勤力，今晚簽完名就去揼骨鬆一鬆。」

祖兒見歌迷行動不便，即上前為他簽名，十分細心。

歌迷索簽名時，祖兒搞笑地提醒她望鏡頭。

歌迷瞓街撲個唱飛

Joey自爆是「骨精王」，她笑說：「我係骨精上腦，好鍾意揼骨，雖然有人話揼得多唔好，但最近腰骨好攰，一輪工作又通宵拍MV，今晚要揼個靚骨、瞓個靚覺！」她長期光顧一位專屬女按摩師：「係叫上門，我用咗佢好多年，佢好大力，出名叫力王。（介紹畀好友？）呢啲梗係要自私，留番畀自己，佢好難Book o架！」她自爆曾找男按摩師做腳底按摩，但揼骨則是女按摩師比較方便。

談及新碟銷量，Joey表示現時唱片市道低迷，歌迷支持正版已很感動：「唔敢期望雙白金成績咁誇。」她還表示11月演唱會銷情理想，有粉絲更通宵瞓街撲飛，令她十分感動！另外，對於陳志雲被廉署正式起訴，她說：「呢個時候唔方便煩佢，會好困擾，我打算SMS佢，佢喺TVB好照顧我哋。」