有線主持鄭文現已懷有六個多月身孕，將正式暫別與區永權、劉明軒及黃芳雯主持的節目《大娛堂》，隨着腹部日漸隆起，鄭文將咪牌親手交給幾位好拍檔，並說：「我預產期喺12月，雖然啲朋友話唔係肥咗好多，但近來都只係主持一啲見到上半身嘅節目，等我生完個女，睇吓收身成績點，再考慮幾時歸隊啦！」

未婚的黃芳雯（左起）和劉明軒，不時摸鄭文的大肚子沾旺氣。

區永權與鄭文互送小孩子的禮物。

鄭文有喜之外，去年結婚的區永權亦報喜，指太太已大肚五個月，囝囝預期在明年一月出世，區永權坦言太太懷胎很辛苦，他心痛地說：「佢嘔足咁多個月，做媽媽真係唔容易，第日都要教BB要孝順媽咪多啲，我覺得女人生BB咁辛苦，做丈夫嘅真係應該爭取侍產假，幫手分擔吓囉！」

劉明軒讚「繁殖力強」

區永權和鄭文即將榮升父母級，二人互送禮物給未出世的小朋友，並笑稱將來要帶同BB一齊開會度橋。至於未婚的劉明軒及黃芳雯則一臉羨慕，並笑說：「《大娛堂》繁殖力超強勁，短期內已開枝散葉。」兩人坦言為沾旺氣，不時會摸鄭文的大肚子。