17/09/2010

播放本新聞相關短片

陳敏之失心瘋自然流露

陳敏之花盡心思拍攝劇集《公主嫁到》,被大讚「開竅」,難怪當事人開心不已,自言辛苦有價!

無綫劇集《公主嫁到》平均錄得34點收視,尤其扮演刁蠻大公主的陳敏之,把自己的罪行嫁禍妹妹佘詩曼身上,結果敏之害人終害己,罪行被揭發後被貶為庶民!最終的十分鐘戲份,儼如敏之的「個人表演」,其失心瘋的表現獲讚演出不俗,同場的謝雪心亦十分壓場,二人同樣出色!

敏之被讚後儼如打了強心針般,開心地說:「冇諗過出嚟反應咁好,證明自己冇白費心機,今次拍得辛苦,仲整親條頸!(慶祝?)咁又冇,但早兩日見到心姐(謝雪心),大家都有互相恭喜。」敏之坦言在心姐身上獲益良多,事前兩人已交流該如何演繹那場戲,但最終各自投入情緒,敏之說:「心姐嗰場大戲完全係自由發揮,我畀佢帶埋入戲,真係成個人癲咗!好多嘢都係自然流露出嚟,佢眼神好勁,對我幫助好大。」

做「綠葉」贏好評

敏之今次戲份一般,身為「綠葉」的她深明無論怎樣,最緊要是把握機會:「好耐冇試過咁多人讚,以前多數被彈,又或者冇人提……今次全部都係讚美嘅說話,仲要唔係自己嘅影迷,所以好開心同意外,琴姐(李香琴)都同我講有睇嗰場戲,前輩讚仲開心啲添!」

影視組