自美國平安返抵本港後，名模Rosemary聽從律師意見取消記者會，亦不會出席鄧達智（William）於本周四舉行的珠寶活動。William昨晨接受查小欣訪問時表示，Rosemary對於國際電視台BBC及CNN大肆報道，以及本港傳媒刊登其「孖葉相」感到愕然，更激動落淚：「佢冇諗過會搞到咁大件事，冇諗過BBC同CNN會報道，佢喺美國返嚟時好攰，睇到啲新聞好唔開心，瞓唔着，但星期六已經好好多，瞓得着！」
自知言論不負責任
問到對事件的看法，William說：「我哋之間有共識，It's no big deal（沒甚麼大不了）！我都同意佢，喺今時今日世風日下，真係No big deal！其實我都明白唔應該喺大氣電波咁講，有啲不負責任，但我哋知道件事去到咩程度。」他表示了解Rosemary有時會「百厭」，但會全力支持她，查小欣即說：「了解還了解，但我完全唔贊同！」
至於取消記者會一事，William說：「當地律師叫佢最好唔好講嘢，怕佢畀人逼得緊要，會講啲唔應該講嘅嘢，能夠嘅話唔好見大眾，等佢安靜度過，直到返美國。」而本為Rosemary安排記者會的資深公關葉潔馨則認為，記者會應如期舉行：「我作為公關，覺得佢應該開記者會交代事件始末，挽回形象。」
不過，Rosemary昨晚透過SMS回覆本報記者：「What William said is 100％not true. Please only take statements directly from me. Thx（William的言論百分百不正確，請只以我的說話為準，謝謝）」而其母Julie則透過短訊力撐愛女：「請憐憫受壓力的人，讓時間證明一切吧！」至於William昨晚接受本報記者訪問時亦突然改口風，指「No big deal」只是他的想法：「呢個係我以平常心睇呢件事嘅諗法，因為我認為世風日下，完全唔係Rosemary嘅想法！佢連記者會都唔開，點會咁講？頭先我都收到佢嘅短訊問我，我要澄清佢冇咁講過！」
出庭前返法國小休
另外，Rosemary昨晚已急急腳離開本港，返法國家鄉休息，William說：「佢幫本雜誌Shooting，加上嫲嫲住喺法國，想過去休息。原本唔係去得咁急，但既然香港工作唔繼續，不如早啲過去，法國屋企安靜，等佢清靜吓。」其父在東南亞做生意，屆時將於法國會合她，而母親Julie則陪她赴美出席聆訊。據知，Rosemary將於下月14日返港出席《Hong Kong Dog Rescue》慈善活動，亦是她出事後在港的首個公開活動。