名模Rosemary早前在美國先後涉嫌藏毒及撞車後不顧而去，保釋外出後翌日立即秘密返港，由於下周四Rosemary將演出時裝設計師何國鉦的時裝騷，故有傳她會在活動交代一切。

不過本報記者昨日聯絡上與Rosemary關係密切的時裝設計師鄧達智，他透露下周四早上，Rosemary會率先亮相他有份參展的珠寶展：「我有個朋友參展，啲珠寶有部分係我設計嘅，而Rosemary嗰日去就做開幕嘉賓，活動半個鐘就完，之後就會即刻開記者會，依家睇緊喺番會展定隔籬君悅。」

他表示昨晨曾和Rosemary通電話，指她心情平復不少：「因為啱啱返嚟嗰晚佢瞓唔到，但尋（前）晚瞓番一覺，今日即刻精神番同心情好啲！」

大覺瞓心情好

另一邊廂，昨晚九時許何國鉦突然表示Rosemary行騷一事已擱置，他說：「我知佢呢幾日好多私事要處理，冇得Fitting又未綵排，原本搵佢行壓軸，但唔想影響到佢私務，只好等下一次先合作。」（Rosemary出席鄧達智活動喎？）係咩？其實邊個用都冇所謂，大家都咁錫佢，邊個搵佢行Show都咁開心，同埋我會同佢長期有合作，希望佢雨過天青啦！」

另外，記者昨日致電Rosemary，聽電話的是其男性朋友，問到Rosemary的心情時，他說：「佢冇乜嘢，嚟緊會照樣出席慈善時裝騷，食得好瞓得好，因天氣唔好，佢留喺屋企睇電影同埋休息。」記者隨即問可否與Rosemary傾兩句，此時Rosemary在電話中說了一聲「Hello」，其後再將電話交回友人。

Julie自爆有重病

至於媽咪Julie方面，她在電話中表示現階段不知說甚麼好，不過下周開記者會盡快交代事件：「佢嚟緊會有活動，希望喺活動前講清楚先，唔想影響有關嘅工作。」

問到母女關係是否和好？Julie說：「我哋依家關係好過之前好多，件事令到我哋感情好咗，加上我有病，有啲嘢發生喺我身上，佢係知道，所以佢好照顧我，如果唔係都唔會搬返嚟同我住。（你有重病？）係，喺年頭已經知，乜病唔好講，Rosemary都唔知我有乜病，我依家精神唔係咁好，成日要喺屋企休息，同埋返教會。（Rosemary依家係咪喺度？）佢呢兩日去朋友度住，屋企門口太多傳媒等佢。」

Julie表示女兒沒有詳談在美國發生的事，只表示沒有撞車不顧而去。至於涉嫌藏毒，Julie說：「佢冇同我講呢部分，話律師會處理，但佢從來都冇碰過呢啲嘢，我認為佢冇食過，所以唔係好擔心。希望佢喺呢件事上，可以學到啲嘢。」