原定Rosemary下星期四穿上何國鉦設計的時裝，為善學慈善基金晚宴行騷，昨日何國鉦向Rosemary大派定心丸，揚言不換人：「下晝Rosemary打電話畀我，通知我佢今（昨）朝已平安返港，佢話所有事已交律師處理。佢好攰，冇瞓過，今日我同佢通電話時，佢冇喊。作為朋友，我覺得佢好勇敢去面對，佢知道大家都好關心佢。」
Rosemary會否出席行騷？何國鉦說：「佢擔心傳媒焦點集中喺佢身上，怕影響個騷，所以佢同我講，打算會見傳媒交代事件，記者會或者由佢屋企人搞。」
他讚Rosemary做事有責任感，不會只顧自己：「佢唔只擔心自己嘅事，亦好關心個騷，佢希望事件淡化先至出席我呢次活動，所以佢想之前交代清楚。佢仲話，如果個客怕事件影響到個騷，唔介意換人。佢心地咁好，所以我咁錫佢。我希望佢喺心理狀況Ready才做騷。（換人？）我有足夠Model，總之我歡迎佢做呢個騷！」不過對於Rosemary何時返港，何國鉦與鄧達智說法略有出入。